«Salamatty Qazaqstan» poıyzy shalǵaı stansa turǵyndaryna medıtsınalyq kómek kórsetti
26 sáýir men 10 mamyr aralyǵynda «Salamatty Qazaqstan» medıtsınalyq poıyzy Qopa, Medeý, Jetisý, Shelek, Tasqarasý, Aıdarly, Jetigen, Іle stansalarynda boldy. Poıyz mamandary atalǵan stansalardyń 4 616 turǵynyn, onyń ishinde 887 balany, 3 729 eresek adamdy tekserdi.
Naqtyraq aıtqanda, jalpy praktıka dárigeri/terapevt/pedıator – 860, hırýrg – 2 419, ýrolog – 722, nevropatolog – 1987, oftalmolog – 2 033, lor – 1 452, akýsher-gınekolog – 377, stomatolog – 1 189, psıholog 9 adamdy qabyldady. Munan bólek, 471 adam elektrokardıografııaǵa, 1 821 adam ÝDZ-ǵa, 103 adam flıýorografııaǵa túsirildi.
Al búgin «Salamatty Qazaqstan» medıtsınalyq poıyzynyń bilikti mamandary Jetisý oblysyna qarasty Kóksý stansasynyń turǵyndaryna medıtsınalyq kómek kórsetip jatyr.
Aıta keteıik, «Salamatty Qazaqstan» medıtsınalyq poıyzy 26 sáýir kúni «Almaty-2» temirjol vokzalynan jolǵa shyqty.
Poıyzdyń ishi emhanadaǵydaı jabdyqtalǵan. Kez kelgen medıtsına mekemesine kelgen adam, aldymen tirkeý bólimine barady. Munda da dál solaı. Terapevt, hırýrg, kardıolog, lor, pedıatr sııaqty qajetti mamandardyń jeke kabıneti bar. Tipti, arnaıy zerthana da qarastyrylǵan. Zertteý nátıjeleri 15 mınýttyń ishinde daıyn bolady. Dárigerler 6 jeltoqsanǵa deıin oblys, aýdan ortalyqtarynan shalǵaı jerde ornalasqan 120 stansaǵa barady. Boljam baıynsha 75 myń adamǵa medıtsınalyq kómek kórsetiledi. Medıtsınalyq poıyzda 35 bilikti maman bar.
Jobany «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory, QR Prezıdenti janyndaǵy áıelder isteri jáne otbasylyq-demografııalyq saıasat jónindegi ulttyq komıssııanyń jáne Densaýlyq saqtaý mınıstrliginiń qatysýymen, «Qazaqstan temir joly» UK» AQ janyndaǵy «Áleýmettik jobalar qory» korporatıvtik qorymen jáne aqparattyq seriktes - Jibek Joly telearnasymen birge júzege asyrady.
Aıta keterligi, medıtsınalyq poıyzdyń bul jolǵy qozǵalys kestesi de azamattar men memlekettik organdardyń ótinishi negizinde shalǵaıdaǵy stansalarda medıtsınalyq pýnktterdiń joqtyǵy eskerile otyryp jasalǵan.