«Salamatty Qazaqstan» poıyzy Beskól stansasynda jurtty qabyldaıdy

ASTANA. QazAqparat – Erteń Jetisý oblysyndaǵy Beskól stansasynyń turǵyndary «Salamatty Qazaqstan» aoıyzy usynatyn bilikti medıtsınalyq qyzmetke júginý múmkindigin alady, dep habarlaıdy QazAqparat tilshisi.

Medıtsınalyq poıyz Beskól stansasyna saǵat 08:55-te jetedi dep josparlanǵan.

Eki kún boıy halyqty sapaly medıtsınalyq tekserýden ótkizgen mamandar 20 mamyr kúni keshki saǵat 19:00-de qaıta jolǵa shyǵady.

Bul marshrýt terapevt, stomatolog, oftalmolog, lor, hırýrg, ýrolog, mammolog, pedıatr jáne taǵy da basqa bilikti mamandar men tıisti medıtsınalyq kabınetter tapshy óńirlerdi aralap keledi.

«Salamatty Qazaqstan» poıyzy tasyp júrgen mamandar atalǵan óńir turǵyndaryna zamanaýı qurylǵylardyń kómegimen tegin qyzmet kórsetip, dıagnoz qoıady.

Poıyzda dıagnostıkalyq qurylǵylardan bólek emdeý aspaptary da bar.

Ýltradybystyq zertteý apparaty, flıýrografııalyq aspap, shaǵyn ota bólmesi, zerthanalar men symsyz ınternet te ornatylǵan.

Eske salaıyq, «Salamatty Qazaqstan» jobasy qaıta jandanyp, relstegi emhana temirjol jetken shalǵaı eldi mekenderdi aralaýǵa shyqqan bolatyn.

Prezıdent teleradıokesheni - «Salamatty Qazaqstan» áleýmettik jobasynyń negizgi aqparattyq seriktesi bolyp otyr.