«Salamatty Qazaqstan» poıyzy Atyraý oblysynyń Aqqystaý aýylyna aıaldap tur

ATYRAÝ. QazAqparat - «Salamatty Qazaqstan» medıtsınalyq poıyzy Atyraý oblysynyń Isataı aýdanyndaǵy Aqqystaý aýylyna jetti. Poıyz osyǵan deıin elimizdegi 70-ten asa beketke toqtaǵan, dep habarlaıdy QazAqparat tilshisi.

Aqqystaý aýyly - «Salamatty Qazaqstan» medıtsınalyq poıyzy toqtaıtyn óńirdegi segiz bekettiń besinshisi.

Atyraýda 2 qyrkúıekten bastap búginge deıin 1 500-ge jýyq turǵynǵa medıtsınalyq kómek kórsetilgen.

Bıylǵy jobanyń ereksheligi - QR Prezıdenti janyndaǵy Áıelder isteri jáne otbasy-demografııalyq saıasat jónindegi ulttyq komıssııanyń bastamasymen qosylǵan psıholog, medıator jáne zańgerler 560 adamǵa keńes berip úlgergen.

«Aqqystaý aýyl okrýginde 10 648 adam turady. Turǵyndarǵa bir aı buryn osy medıtsınalyq poıyzdyń keletinin habarladyq. Jalpy qazir halyqtyń óz densaýlyǵyna degen jaýapkershiligi artqany baıqalady. Buryn flıýorografııaǵa túsýdiń ózinen qashatyn. Al búgin ózderi kelip, kezekke turyp, dárigerlerge qaralyp jatyr» - dedi aýyl ákimi Ǵadil Boranbaev.

Medıtsınalyq poıyzda aýyl turǵyndary terapevt, stomatolog, oftalmolog, lor, hırýrg, ýrolog, nevropatolog, akýsher-gınekolog sııaqty dárigerlerdiń keńesin alyp, tegin tekserýden ótip jatyr.

«Salamatty Qazaqstan» medıtsınalyq poıyzy shalǵaıda ornalasqan aýyl-aımaq turǵyndaryna tegin kómek kórsetedi. Poıyz 8 vagonnan turady, onyń 4-i tolyq medıtsınalyq quraldarmen jabdyqtalǵan. Naýqastardy esh kedergisiz qabyldaımyz. Tekserýden ótkennen keıin lezde taldaý qorytyndysyn shyǵaryp beremiz. Baıqap otyrsaq, aýyl turǵyndary kóbine stomatologtyń kómegine júginip jatyr. Sondaı-aq nevropatolog, hırýrg jáne ÝDZ-ge jıi tekseriledi», - deıdi «Salamatty Qazaqstan» medıtsınalyq poıyzynyń bas dárigeri Aınur Igınbaeva.

Aýylǵa at basyn tiregen medıtsınalyq poıyzǵa qaralýshylardyń biri - Kúlaıym Ábdirenova. Ol mundaı tegin kómektiń turǵyndardy qýantyp otyrǵanyn aıtady.

«Aqqystaý aýylynda kópten beri turamyn. Bizdiń aýyldan qalaǵa qatynaý úshin jarty kún ýaqytyń ketedi. Odan jetkesin emhanada kezekke turatynyń taǵy bar. Solaı keıinge qalyp júrgen, arasynda mazalaıtyn tisim bar edi. Sony juldyryp shyqtym. Dárigerler meıirimdi, qoldary jeńil eken, rızamyn. Osylaı alystaǵy bizderdi elep, jıirek kelip tursyn» deıdi ol.

«Salamatty Qazaqstan» poıyzyna búginge deıin elimizdiń shalǵaı stansalarynda turatyn 92 049 adam júgingen, onyń 45 710-y ǵana negizgi medıtsınalyq tekseristen ótken.

Kómek alýshylardyń ishinde 10 520-sy - balalar.

Jalpy dárigerler bes aıda poıyz ishinde 5377 ret shaǵyn hırýrgııalyq ota jasaǵan. Al psıhologııalyq jáne quqyqtyq keńes alýshylar sany 5 572 adamǵa jetken.

«Quqyqtyq baǵytta qyzmet kórsetip otyrǵan bilikti zańgerler men medıatorlar aýyl turǵyndarynyń birqatar túıtkildi máselelerin sheship bergen. Aldaǵy ýaqytta 75 myńǵa jýyq aýyl turǵyny negizgi emdik-konsýltatsııalyq qyzmet alady dep kútilip otyr. Bıyl medıtsınalyq poıyz óz jumysyn 6 jeltoqsanǵa deıin jalǵastyryp, jospar boıynsha 120-dan astam stantsııaǵa barady», - dedi «Samruk-Kazyna Trust» áleýmettik jobalardy damytý qorynyń bas dırektory Alfııa Adıeva.

Aıta ketsek, joba «Samuryq-Qazyna» AQ kompanııalar toby atynan «Samruk-Kazyna Trust» áleýmettik jobalardy damytý qory, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa men Densaýlyq saqtaý mınıstrligimen jáne «Áleýmettik jobalar qorymen» yntymaqtastyqta iske asyrylyp jatyr.

Al arnaıy jobanyń basty aqparattyq seriktesi – QR Prezıdentiniń teleradıokesheni.