«Salamatty Qazaqstan» poıyzy Altaı beketine toqtady
Búgin saǵat 22.15 shamasynda joǵary bilikti medıtsınalyq mamandar toptastyrylǵan «Salamatty Qazaqstan» poıyzy Altaı aýdany Bykovo eldi mekeninde ornalasqan Altaı beketine kelip toqtady. QazAqparat tilshisi beketke baryp, olardy arnaıy qarsy aldy.
«Jaqsy jettik. Taýsamaly beketinen kele jatyrmyz. Onda adam óte kóp boldy. Tipti flıýrografııanyń ózinen 600-den astam adam ótti. Jalpy medıtsınalyq poıyz 26 sáýirde Almatydan jolǵa shyqqan. Shyǵys Qazaqstan jáne Abaı oblystaryn 23 mamyr men 12 maýsym aralyǵynda aralaımyz», - deıdi medıtsınalyq poıyzdyń menedjeri Arystan Qýandyqov.
Poıyz erteńnen bastap dárigerlerdiń kómegine júgingisi kelgen Altaı aýdanynyń halqyn qabyldaıdy. Aq halattylar eki kún boıy tańǵy saǵat 9.00-den keshki 18.00-ge deıin jumys isteıdi. 13.00-14.00 aralyǵynda túski úzilis.
Terapevt, stomatolog, pedıatr, oftalmolog, hırýrg, ýrolog, lor, mammolog syndy bilikti mamandar turǵyndardy esh aqysyz qaraıdy. Poıyz zamanaýı qurylǵylarmen jabdyqtalǵan. Sondaı-aq shaǵyn ota bólmesi de bar.