«Salamatty Qazaqstan» medpoıyzy Jarma stansasyna aıaldaıdy
Erteń, 23 mamyr kúni tańǵy saǵat 07:16-da medıtsınalyq poıyz Jarma stansasyna kelip toqtaıdy. Sol sátten bastap stansa turǵyndary joǵary bilikti medıtsınalyq kómek ala alady. Al bir kúnnen keıin, ıaǵnı 24 mamyr kúni saǵat 23:30-da poıyz qaıta jolǵa shyǵady.
Poıyz baǵdary medıtsınalyq kabınetteri joq óńirlerdi qamtıdy. Demek, bıyl shalǵaı stansalardyń turǵyndary tegin tekserýden ótip, terapevt, stomatolog, oftalmolog, lor, hırýrg, ýrolog, mammolog, pedıatr syndy biliktiligi joǵary mamandardan em alady. Poıyz zamanaýı dıagnostıkalyq jáne emdeý jabdyqtarymen, ÝDZ-men, flıýorografııalyq apparatpen, shaǵyn ota zerthanasymen, ınternetke symsyz qosylýǵa múmkindik beretin baılanys quralymen jabdyqtalǵan.
Qazirgi ýaqytqa deıin poıyz Jetisý oblysynda boldy. Dárigerler Kóksý, Qalpe, Lepsi, Aqtoǵaı, Beskól stansalarynyń turǵyndaryna joǵary bilikti medıtsınalyq kómek kórsetti. Jetisý oblysyndaǵy medıtsınalyq týr Dostyq stansasynda aıaqtaldy.
Aıta keteıik, «QTJ-Júk tasymaly» JShS 26 sáýir kúni Almaty-2 stansasynan jolǵa shyqqan «Salamatty Qazaqstan» medıtsınalyq poıyzynyń kestesin bekitken bolatyn. Poıyz osy jyldyń 6 jeltoqsanyna deıin elimizdiń shalǵaı stansalaryn aralap, turǵyndarǵa medıtsınalyq kómek kórsetedi.
Jobany «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń jáne Densaýlyq saqtaý mınıstrliginiń qatysýymen, «Qazaqstan temir joly» UK» AQ janyndaǵy «Áleýmettik jobalar qory» korporatıvtik qory júzege asyrady.
Aıta keterligi, medıtsınalyq poıyzdyń qozǵalys kestesi azamattar men memlekettik organdardyń ótinishi negizinde jasalǵan.