«Salamatty Qazaqstan» medpoıyzy Shyǵys Qazaqstan men Abaı oblystarynda jumysyn bastady
Dárigerler alǵashqy medıtsınalyq-sanıtarlyq kómek kórsetip, keńes berýler men tekserýler júrgizedi. Qajet bolǵan jaǵdaıda shaǵyn operatsııalar jasalyp, keıbir naqty baǵyttaǵy mamandary men emhanalary joq alys aýyl turǵyndaryna josparly emdeýge jatqyzýǵa joldama beredi. Naýqastardy qabyldaý saǵat 9:00-den 18:00-ge deıin qabyldanady. Túski asqa úzilis saǵat 13:00-den 14.00-ge deıin bolady.
Medıtsınalyq poıyz búgin tańerteńgi 07:16-da Jarma stansasyna aıaldady. Aldaǵy ýaqytta Ertis zaýyty, Tıshınskaıa, Ermakovka, Taýsamaly, 31 mamyr Altaı, Kúmistaý, Shar, Sýyqbulaq, Belaǵash jáne Degeleń beketterinde bolady.
Poıyz baǵdary medıtsınalyq kabınetteri joq óńirlerdi qamtıdy. Demek, bıyl shalǵaı stansalardyń turǵyndary tegin tekserýden ótip, terapevt, stomatolog, oftalmolog, lor, hırýrg, ýrolog, mammolog, pedıatr syndy biliktiligi joǵary mamandardan em alady. Poıyz zamanaýı dıagnostıkalyq jáne emdeý jabdyqtarymen, ÝDZ-men, flıýorografııalyq apparatpen, shaǵyn ota zerthanasymen, ınternetke symsyz qosylýǵa múmkindik beretin baılanys quralymen jabdyqtalǵan.
Áıelder isteri jáne otbasylyq-demografııalyq saıasat jónindegi ulttyq komıssııanyń bastamasymen poıyz jumysyna alǵash ret azamattarǵa tıimdi psıhologııalyq, quqyqtyq jáne medıatıvtik (tatýlastyrý) kómek kórsetetin kásibı psıholog, medıator jáne zańger tartylǵan. Budan basqa, azamattardyń memlekettik áleýmettik qoldaý alý quqyqtaryn qorǵaý, zeınetaqylar, járdemaqylar, áleýmettik tólemder jáne ataýly áleýmettik kómek alý máseleleri boıynsha tegin keńester qarastyrylǵan.
Buǵan deıin, 2023 jylǵy 10-22 mamyr aralyǵynda «Salamatty Qazaqstan» medıtsınalyq poıyzy Jetisý oblysynyń alty shalǵaı beketin júrip ótken bolatyn. Densaýlyq kerýeni qyzmetkerleri Kóksý, Qalpe, Lepsi, Aqtoǵaı, Beskól jáne Dostyq stansalarynyń turǵyndaryn qarady. Tipti, Dostyq stansasynda dárigerlerge Belarýstan kelgen júk kóliginiń júrgizýshisi júgindi.
«Maǵan jergilikti aýrýhanada osy poıyzǵa qaralýǵa keńes berildi. Ózim de sóıttim. Dárigerler meni óte tez tekserip, qol ushyn sozdy. Osylaısha aýyrǵanym basylyp, saparymdy ári qaraı jalǵastyrýǵa múmkindik týdy. Bul sizderdiń elderdegi halyqqa áleýmettik qoldaý kórsetýdiń máni zor, jaqsy belgisi. Osyndaı qonaqjaılylyq pen qamqorlyqtaryńyz úshin sheksiz alǵysymdy bildiremin. Sheteldik retinde ózge elde qıyn sátte jalǵyz qalmadym», - dedi Maksım Lýkıanchenko.
Jalpy, konsýltatıvtik-dıagnostıkalyq poıyzdyń dárigerleri 3695 turǵyndy, onyń ishinde 1648 balany qabyldady. Dárigerlik qaraýlardyń jalpy sany - 10628. 86 shaǵyn hırýrgııalyq operatsııa jasaldy.
«Bul múmkindik úshin bizdiń rızashylyǵymyzdy sózben jetkizý tipti múmkin emes. Tegin tekserilip, emdeldik. Biz búkil otbasymyzben medpoıyzdyń kelýin asyǵa kúttik. Barlyq mamandarǵa qaralyp, qajetti taǵaıyndaýlar aldyq. Mysaly, meniń ókpem tekserilip, emdelýdiń tolyq kýrsy taǵaıyndaldy», - dedi Lepsi stansasynyń turǵyny Bolatbek.
Poıyzdyń ár mamany kóptegen naýqasty tekserdi: jalpy tájirıbe dárigeri, terapevt, pedıatr - 594 adam; hırýrg – 1 629; ýrolog – 1 112; nevropatolog – 943; oftalmolog – 1 878; LOR – 1 398; akýsher-gınekolog – 270; stomatolog – 1 142; EKG - 713; ÝDZ - 742; FLG – 74 jáne psıholog - 47 adam.
Esterińizge sala keteıik, jobany «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory, Densaýlyq saqtaý mınıstrliginiń qatysýymen, «Áleýmettik jobalar qory» korporatıvtik qorymen jáne aqparattyq seriktes - Jibek Joly telearnasymen birlesip júzege asyrýda.
Áleýmettik jobalar qorynyń málimeti boıynsha, poıyzda zertteýge qajetti barlyq jabdyq bar. Medıtsınalyq poıyz búkil Qazaqstandy aralap, shalǵaı aýdandardaǵy 121 stansany qamtıdy.