«Salamatty Qazaqstan» medıtsınalyq poıyzy Jetisý oblysynyń Aqtoǵaı stansasynda aıaldaıdy

ASTANA. QazAqparat – Erteń, 17 mamyr kúni Jetisý oblysynyń Aqtoǵaı stansasy turǵyndary joǵary bilikti medıtsınalyq kómekke qol jetkizedi. Eldi mekenge «Salamatty Qazaqstan» medıtsınalyq poıyzy kelip toqtaıdy, dep habarlaıdy QazAqparat tilshisi.

Medıtsınalyq poıyz stansaǵa saǵat 8:15-te jetedi. Al eki kúnnen keıin, ıaǵnı 19 mamyr kúni saǵat 7:00-de poıyz qaıta jolǵa shyǵady.

«Salamatty Qazaqstan» medıtsınalyq poıyzy 26 sáýir kúni «Almaty-2» temirjol vokzalynan attanǵan bolatyn. Poıyz baǵdary medıtsınalyq kabınetteri joq óńirlerdi qamtıdy. Demek, bıyl shalǵaı stansalardyń turǵyndary tegin tekserýden ótip, terapevt, stomatolog, oftalmolog, lor, hırýrg, ýrolog, mammolog, pedıatr syndy biliktiligi joǵary mamandardan em alady. Poıyz zamanaýı dıagnostıkalyq jáne emdeý jabdyqtarymen, ÝDZ-men, flıýorografııalyq apparatpen, shaǵyn ota zerthanasymen, ınternetke symsyz qosylýǵa múmkindik beretin baılanys quralymen jabdyqtalǵan.

Qazirgi ýaqytta poıyz Jetisý jáne Almaty oblystarynyń shalǵaı eldi mekenderin aralap keledi. Búginge deıin jyljymaly quram Qalpe, Qopa, Medeý, Jetisý, Shelek, Tasqarasý, Aıdarly, Jetigen, Іle stansalarynda boldy.

Jobany «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń jáne Densaýlyq saqtaý mınıstrliginiń qatysýymen, «Qazaqstan temir joly» UK» AQ janyndaǵy «Áleýmettik jobalar qory» korporatıvtik qory júzege asyrady, aqparattyq seriktes – Jibek Joly telearnasy.

Aıta keterligi, medıtsınalyq poıyzdyń qozǵalys kestesi azamattar men memlekettik organdardyń ótinishi negizinde jasalǵan.