«Salamatty Qazaqstan» medıtsınalyq poıyzy soltústik óńirlerge jetti
«Salamatty Qazaqstan» mamandandyrylǵan medıtsınalyq poıyzy Soltústik Qazaqstan oblysy men Aqmola oblysynda óz jumysyn bastady. 17 tamyz ben 9 qazan aralyǵynda jyljymaly emhana 16 stansaǵa toqtap, turǵyndardy qabyldamaq. Jumys ýaqyty tańǵy saǵat 9:00-de bastalyp, túste bir saǵat úzilis jasap, 18:00-ge deıin jalǵasady. Máselen 17-18 tamyz kúnderi Erkinshilik stantsııasynda syrqattardy qabyldamaq.
Medıtsınalyq poıyz mamandary Qazaqstan óńirlerindegi shalǵaı stantsııalardyń turǵyndaryn tegin qabyldaýdy jáne tekserýdi maqsat etken. Buǵan deıin 31 shilde men 16 tamyz aralyǵynda medıtsınalyq poıyz Pavlodar oblysyna baryp, 9 stantsııanyń turǵyndaryn qabyldady. Oblysta bolǵan eki apta ishinde konsýltatsııalyq-dıagnostıkalyq poıyzdyń mamandary 1600-ge jýyq turǵyndy, onyń ishinde 273 balany, 1319 eresekti qabyldady. Sonyń ishinde jalpy praktıka dárigeri, terapevt pen pedıatrǵa qaralǵandardyń úlesi joǵary - 1104 adam boldy. Hırýrgke 1030 adam, kóz dárigerine 824 adam jazyldy. Medıtsınalyq poıyzdyń kabınetterinde EKG, ÝDZ jáne flıýorografııalyq tekserister de júrgiziledi.
«Poıyz mamandarynyń qabyldaýyna 1975 jyly týǵan Gúljıhan Serǵazınova esimdi Maraldy stantsııasynyń turǵyny keldi. Flıýorografııalyq zertteý barysynda erekshe jaǵdaıdyń kýási boldyq. Naýqasta óte sırek kezdesetin dıagnoz – dekstrokardııa bar ekeni anyqtaldy. Bul degenimiz naýqastyń júregi oń jaǵynda ornalasqan», – deıdi «Salamatty Qazaqstan» medıtsınalyq poıyzynyń jetekshisi Aman Qasenov.
Medıtsınalyq poıyz Aqmola oblysy men SQO-ǵa saparynan keıin Qostanaı, Qaraǵandy, Ulytaý oblystarynyń stantsııalary boıynsha óz jumysyn jalǵastyrady.
«Salamatty Qazaqstan» medıtsınalyq poıyzy 20 maýsymda Almaty oblysynyń Baıserke stantsııasynan jolǵa shyqqan bolatyn.
Sondaı-aq 23 mamyr kúni «Járdem» medıtsınalyq poıyzy jolǵa attanǵan edi. Qazir ol Qyzylorda oblysynda jumys istep jatyr. Óńirde 1 qyrkúıekke deıin bolady. Jalpy «Salamatty Qazaqstan» jáne «Járdem» medıtsınalyq poıyzdary elimizdiń shalǵaı aýdandaryndaǵy 147 stantsııany qamtymaq.
Medıtsınalyq poıyzdardyń qozǵalys kestesi týraly naqty aqparatty jobanyń www.medpoezd.kz resmı saıtynan nemese 8 7172 60 45 94, 8 701 206 15 40 nómirleri arqyly, sondaı-aq @medpoezd.kz Instagram paraqshasynan bilýge bolady.
Jobany «Samruk-Kazyna Trust» áleýmettik jobalardy damytý qory, QR Densaýlyq saqtaý mınıstrligi, «Qazaqstan temir joly» UK AQ janyndaǵy «Áleýmettik jobalar qory» korporatıvtik qorymen birlesip júzege asyrǵan.
Foto: gov.kz