«Salamatty Qazaqstan» medıtsınalyq poıyzy Kúmistaý stantsııasyna aıaldaıdy

ASTANA. QazAqparat – Erteń, ıaǵnı 2 maýsymda Shyǵys Qazaqstan oblysynyń Kúmistaý stantsııasyna «Salamatty Qazaqstan» medıtsınalyq poıyzy aıaldap, turǵyndarǵa joǵary bilikti mamandar medıtsınalyq kómek kórsetedi, dep habarlaıdy QazAqparat tilshisi.

Medıtsınalyq poıyz keshki saǵat 21:03-te atalǵan aıadamaǵa kelip, eki kún dertine daýa izdegen turǵyndardy qabyldaıdy Al, 4 maýsymda saǵat 21:34-te bul stantsııadan shyǵyp ketedi.

Jalpy bul marshrýt eldegi medıtsınalyq kabınetter tapshy óńirlerdiń shalǵaı eldi mekenderin aralap júr. Osylaısha bıyl shalǵaıdaǵy stansalarǵa jaqyn turatyn halyq tegin medıtsınalyq tekserýden ótip, terapevt, stomatolog, oftalmolog, lor, hırýrg, ýrolog, mammolog, pedıatr jáne ózge de joǵary bilikti mamandardyń kómegine júgine alady.

Buǵan deıin medıtsınalyq poıyz Jetisý oblysynda bolǵan edi. Dárigerler Kóksý, Qalpe, Lepsi, Aqtoǵaı, Beskól stantsııalarynyń turǵyndaryna joǵary bilikti medıtsınalyq kómek kórsetti. Jetisý oblysy boıynsha Medıtsınalyq týr Dostyq stantsııasymen aıaqtaldy.

Jetisý oblysynan keıin medıtsınalyq poıyz Shyǵys Qazaqstan oblysyna baǵyt aldy. Dárigerler Shyǵys Qazaqstan oblysy Jarma, Ertis zaýyty, Tıshınskaıa, Ermakovka, Taýsamaly, Altaı stantsııalarynyń turǵyndaryna medıtsınalyq kómek kórsetti.

Aıta keteıik, 26 sáýirde Almaty-2 stantsııasynan bastalǵan «Salamatty Qazaqstan» medıtsınalyq poıyzy 6 jeltoqsanǵa deıin júredi.

«Medıtsınalyq poıyz» jobasyn «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń jáne Densaýlyq saqtaý mınıstrliginiń qatysýymen, «Qazaqstan temir joly» UK» AQ janyndaǵy «Áleýmettik jobalar qory» korporatıvtik qorymen jáne aqparattyq seriktes - Jibek Joly telearnasymen birge júzege asyrady.