«Salamatty Qazaqstan» poıyzy dárigerleri 8 myńǵa jýyq ota jasady

<p>ASTANA. KAZINFORM &ndash; &laquo;Salamatty Qazaqstan&raquo; poıyzy dárigerleri 8 myńǵa jýyq ota jasady. Bul týraly Ortalyq kommýnıkatsııalar qyzmetindegi brıfıngte &laquo;Samruk-Kazyna trust&raquo; áleýmettik jobalardy damytý qorynyń bas dırektory Alfııa Adıeva aıtty.</p>

- Poıyz dárigerleri 101 301 azamatqa medıtsınalyq kómek kórsetti. Olardyń 54 334 - áıelder, 23 685 - erler, 23 282 - balalar. Poıyz ár stantsııaǵa ortasha alǵanda 2 kún toqtap, naýqastardy tekserdi. Tolyq jalpy jáne bıohımııalyq taldaýlar, flıýorografııa, ishki organdar men tamyrlardy ýltradybystyq zertteý, elektrokardıogramma, gastrofıbroskopııa, dıagnostıkalyq zertteýlerdiń basqa da túrleri júrgizildi. Bıyl medıtsınalyq poıyzda ehoentsefalografııa, mammografııa, rentgen qondyrǵylary jańaryp, mamandar qatary travmatolog, psıholog, pedıatr, mobıldik brıgada ókilderimen tolyqty. Jalpy medıtsına dárigeri men terapevtke – 77 104, nevropatologqa – 16 382, oftalmologqa 15 529 adam qaraldy. 7 671 shaǵyn ota jasaldy, - dedi Alfııa Adıeva.

Onyń dereginshe, óńirler bólinisinde halyq tyǵyzdyǵyna baılanysty ońtústik pen batys oblystardaǵy turǵyndarǵa eń kóp medıtsınalyq qyzmet usynyldy.

- Ulttyq komıssııa bastamasymen ekinshi jyl qatarynan jobaǵa medıator men zańger qatysyp, halyqtyń, onyń ishinde áıelder qaýymynyń ózekti máseleleriniń sheshilýine kúsh salyndy. Poıyzda turaqty túrde 3 zańger men 3 medıator jumys istedi. Nátıjesinde 2 949 azamattyń aryzy qarastyryldy. Onyń 1 844-i medıatorǵa túsken ótinish bolsa, 1 105-y zańgerge qatysty suraqtar boldy. 1 630 er adam jáne 1298 áıel óz máselelerimen júgindi. Oblystar ishinde eń kóp suraqtar Mańǵystaý, Abaı, Shyǵys Qazaqstan jáne Batys Qazaqstan oblystarynyń turǵyndarynan kelip tústi, - dedi ol.

Osyǵan deıin «Salamatty Qazaqstan» poıyzy bıyl 100 myńnan astam adamǵa kómek kórsetkenin jazdyq.