Salalyq jýrnalıstıkany damytýda úlken jumys istelip jatyr – Aqparat mınıstri

NUR-SULTAN. QazAqparat – Elimizde salalyq jýrnalıstıkany damytýǵa asa mán berilip jatyr. Sonymen qatar BAQ ókilderiniń kásibı biliktiligin kóterý máselesi de qolǵa alyndy. Bul týraly QR Aqparat jáne qoǵamdyq damý mınıstri Aıda Balaeva málim etti, dep habarlaıdy QazAqparat tilshisi.

«Aldymen tilshilerdiń kásibı biliktiligin kóterý kerek. Bul óte mańyzdy. BAQ ókilderin oqytý, biliktiligin kóterý boıynsha mınıstrliktiń naqty jospary bar. Sondaı-aq, elimizde salalyq jýrnalıstıkany damytýda úlken jumys istelip jatyr, salany damytýdy qolǵa aldyq. Keıbir taqyryptar tolyq ashylmaı jatady, onyń sebebi tilshi bógde salanyń qyr-syryn tereń bilmeıdi. Atalǵan olqylyqty ásirese pandemııa kezinde baıqadyq. Sondyqtan da tilshilerdiń kásibı biliktiligin kóterý qajet-aq. Osy jerde baspasóz qyzmetiniń de róli zor. Biz búginde barlyq memlekettik organdardyń baspasóz qyzmetimen jumys júrgizip jatyrmyz», - dedi Aıda Balaeva.

Mınıstrdiń aıtýynsha, BAQ ol halyq pen bılik arasyndaǵy dıalog.

Buǵan deıin mınıstr BAQ-ta ótkir áleýmettik taqyryptardy taratýdaǵy zańnyń saqtalýyna qatysty pikir bildirgen edi.

Aıta keteıik, elordada «Astana Media Week – 2021» medıa aptalyǵy ótip jatyr. Eki kún ótetin medıa sharany tyńdaýshylar onlaın qaraı alady.