Sáláfızm – saıası ıdeologııa

ALMATY. QazAqparat– Іshiń qalaısha qan jylamaıdy, júregiń syzdamaıdy? Quddy bir Ábil men Qabyldyń kebi kelgendeı... Keshe qazaq edi ǵoı, alaıaqtarǵa erdi, sáláfı (psevdo salafı) boldy, sosyn bir-aq kúnde terrorıstke aınalyp shyǵa keldi. Óz qanyn, óz qazaǵyn qoly qaltyramastan óltire saldy. Óz memleketine qarsy shyqty. Demek, kez kelgen sáláfıt kez kelgen ýaqytta terrorıstke aınala alady. Bul týraly Qazaqstan Jazýshylar Odaǵynyń basqarma múshesi Dáýletkereı Kápuly aıtty, dep habarlaıdy QazAqparat.

«Qazir biz sońǵy terrorısti óltirdik dep qýanyp jatyrmyz... shyn máninde óz baýyrymyzdy óltirdik. Qynadaı qyrylǵandardyń bári qyrshyndaı jastar. Olar qaıdaǵy joq bireýlerdiń azǵyrýyna túsip, ajal qushty. Áýlet-juraǵaty bolsa, qara bet bolyp qaldy... Bul Ulttyq tragedııa ǵoı. Sáláfızm din emes, saıası ıdeologııa! Áıtpese, ıslam ǵana emes, kez kelgen dinde adamǵa qııanat jasaý týraly biraýyz sóz taba almaısyz. Adamzat tarıhynda san túrli ıdeologııa úshin osy ýaqytqa deıin mıllıondardyń qany qyp-qyzyl teńiz bolyp aqty. Úlken soǵystardyń basym bóligi ıdeologııa úshin boldy», - deıdi Dáýletkereı Kápuly.

Sáláfızm bizdiń qoǵamǵa synalap enýge ázir tur. Bul jat aǵym qazaq qoǵamyn baıyrǵy salt-dástúrinen bas tartqyzdyrǵysy keledi. Biz el bolyp bundaı bassyzdyqqa jol bermeýimiz kerek. Kerisinshe ótken tarıhymyzǵa, babalarymyzdan qalǵan asyl muraǵa maqtanyshpen qaraýǵa tıispiz.

Jat ıdeologııa bul óte qaýipti. Qanshama eldi ishten iritip, qurdymǵa jóneltti. Bulardyń artynda úlken kúsh tur, úlken qarjy bar. Keıbir top solardyń qyzyǵyn kórip – Otanǵa satqyndyq jasap keledi. Aram pıǵyldy radıkaldar tutas halyqty sońynan ertip, qyrǵynǵa ıtermelep, bir-birine qarsy qoıǵysy keledi. Tipti, aqyryndap óz degenderine de qol jetkizýde. Osylardyń aıtqandarymen júrgen jastar Sırııa men Taıaý Shyǵysqa baryp qaza tapty. Júrekti aýyrtatyn da osy.

«Sondyqtan, biz jat ıdeologııaǵa qarsy týrýymyz kerek. Saıasılanǵan sáláfılik dánekke el bolyp qarsy týrýymyz qajet. San ǵasyr boıyna babalarymyz jandaryn shúberekke túıe júrip qurǵan Máńgilik Eldi saqtap qalý bizdiń azamattyq paryzymyz. Ózimizdiń tereń tarıhymyzben qýattanyp, saf altyndaı salt- dástúrimizdi urpaǵymyzǵa ónege etýimiz qajet. Osyny árbir qazaqstandyq esten shyǵarmasa eken deımin», - deıdi ol.