Salafıtke turmysqa shyqqan áıel qyzynyń psıhıkasy úshin alańdaıdy

ALMATY. QazAqparat – Almatylyq kelinshek Áıgerim radıkal salafıt aǵymyndaǵy kúıeýimen turǵan 11 jylda ne kórgenin aıtyp berdi. Ol jastaıynan ata-anasynyń erkelep ósken jalǵyz qyzy bolǵan. Ómirinde áke-sheshesi betinen qaqpaǵan qyz óz degenin istetetin erke bolyp ósti.

Boıjetip, oqýyn bitirgen kezde Armanmen tanysady. Arman óte tuıyq, birtoǵa jigit edi, namaz oqıtyn, azdap saqal qoıatyn. Áıgerimniń ata-anasy basynda munysyn jaratpady.

Keıin qyzynyń mineziniń shálkestiginen amal joq kelisedi. Biraq, ekeýiniń toıy bolmady. Sebebi oǵan Arman qarsy boldy.

«Men oǵan kúıeýge shyqqanda radıkal salafıt ekenin bilmedim. Birtindep mineziniń múlde tuıyqtalyp bara jatqanyn baıqadym. Bizdiń úıge qonaq kelmeıtin. Eshkimdi tanymaıtynmyn. Úıde men aqsha tabatynmyn. Ol namazhan dostaryn aralap qur júretin. Jeńildiń ústimen, aýyrdyń astymen ómir súrgisi keldi. Qyzym ekeýmizdi asyraýdy múlde oılamaıtyn. Birese, óziniń jaqtastarymen saýdaǵa shyǵatyn, bolmasa úıde jatatyn», - dedi Áıgerim.

Áıgerimge anasy, baýyrlary aqshalaı, zattaı kómektesip turǵan. Bir jylda jas otbasy birneshe ret páter aýystyrǵan.

«Musylmandarda áıeldi alǵan soń asyraý paryz edi ǵoı. Bizde olaı bolmaıtyn. Men dárihanada istedim. Keıde táýlik boıy jumys istedim. Sonda kúıeýim dárihanaǵa kelip, meni kúzetip otyratyn. Qojaıyn kelgen kezde aqshamdy alyp ketetin. Jaǵdaıymyz óte nashar boldy. Jazdygúni maǵan qolǵap kıgizetin. OLH-ten tegin zat izdep júretinbiz. Báleniń bári qyzym mektepke barǵanda bastaldy. Qyzdy mektepke jibergisi kelmeıtin. Óıtkeni ánuran aıtqanyn qalamaıtyn. Qyzym sabaǵynan jıi qalatyn boldy. Keıin balıǵat jasyna jetip qalǵanda májbúrlep oramal taqqyzdy. Balıǵatyna tolǵan soń kúıeýge berem dedi. Bizdiń eldiń zańyna baǵynǵysy kelmedi. Qazaqstanda 18 jasqa tolmaǵan adam nekege tura almaıdy»,- dedi kelinshek.

Áıgerimniń 9 jasynda oramal taqqan qyzynyń júıkesi toza bastady. Túnde qarańǵylyqtan qorqady. Barlyq jerde ákesi aıtyp qoıǵan shaıtan elesteıtin.

«Tún ishinde shaıtan kirip jatyr dep shoshyp oıanatyn. Qyzymdy Psıhıkalyq densaýlyq ortalyǵynda jatqyzýyma týra keldi», - dedi ol.

Áıgerim óziniń salafıt aǵymyndaǵy jigitke kúıeýge shyqqanyna ókinedi. Qyzynyń densaýlyǵy úshin alańdaıdy.

Bul oqıǵaǵa qatysty Almatydaǵy Zarıa Vostoka meshitiniń ımamy Qazbek Ahmetov mynadaı túsinik berdi.

«Halyqtyń arasynda azamattyq neke kóbeıip ketti. Bul oń úrdis emes. Qazaqstannyń Ádilet organdarynda nekesin tirkeý eki adamǵa da jaýapkershilik júkteıdi. Al azamattyq nekede destrýktıvti dinı aǵym ókilderi úshin esh jaýapkershilik joq. Olar 3 ret talaq aıtyp kete beredi. Al jas áıelder ne múlki joq, ne alımenti joq ortada qalady. Qazir QMDB bul protseske jaýapkershilikpen qaraı bastady. Meshit ımamdaryna neke kýáliginsiz neke qııýǵa tyıym saldy. Nemese eki taraptyń da ata-anasy qatysýy talap etiledi. Paıǵambarymyz (s.ǵ.s) ajyrasýǵa qarsy bolǵan», - dedi meshit ımamy