Saqtandyrý qorynan tólenetin áleýmettik tólemderdiń somasy ósedi

ASTANA. QazAqparat – Jumyskerlerin jazataıym oqıǵalardan saqtandyratyn jumys berýshiler úshin saqtandyrý tarıfteri tómendetilmek. Bul týraly Májilistegi Úkimet saǵatynda QR Áleýmettik kodeksiniń jobasyn tanystyrý kezinde QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Jumyskerlerin jazataıym oqıǵalardan saqtandyratyn jumys berýshiler úshin saqtandyrý tarıfterin tómendetý eskerilgen. Bul stavkilerdiń eń tómengi ári eń joǵarǵy dárejesi belgilenedi. Osy dárejeni tańdaý óndiristegi jazataıym oqıǵalar, jaraqat alý jáne kásiptik aýrýlarǵa qaraı anyqtalady. Sondaı-aq saqtandyrý qorynan jáne saqtandyrý kompanııalarynda jınaqtalǵan aktıvterden tólenetin áleýmettik tólemderdiń mólsherin ulǵaıtý kezeń-kezeńimen júzege asyrylatyn bolady», - dedi T. Dúısenova.

Onyń aıtýynsha, keler jyldan bastap jumyssyz qalǵan azamattarǵa jarna tólegen ýaqytyna sáıkes 6 aıǵa deıin burynǵy tabysynyń 45 paıyzyn tóleý qarastyrylyp otyr.

«Áleýmettik kodeks jobasynda, Salyq kodeksinde jáne basqa da ilespe zańdarda kózdelgen is-sharalar ózin-ózi jumyspen qamtyǵan azamattardyń áleýmettik qamsyzdandyrý júıesimen barynsha qamtylýyna jol ashady dep esepteımiz», - dedi mınıstr.

Budan buryn habarlanǵandaı, onlaın platformalar arqyly (ıAndeks Taksı, ıAndeks GO jáne t.b.) jumyspen qamtylǵan azamattar úshin arnaıy salyq rejımi engiziledi.