Sakramentoda Naýryz meıramyn toılady (FOTO)

ASTANA. QazAqparat - Kordova ranchosynda (AQSh, Kalıfornııa shtaty, Sakramentoǵa jaqyn mańda) Naýryz meıramy keń kólemde atalyp ótti.

River Bend Park-te Naýryzdy atap ótý úshin 60-tan astam adam jınalǵan. Aqsaqaldar jáne uıymdastyrýshylar - Rashıd Saparǵalıev pen Erdan Núsipov jıylǵandardy meırammen quttyqtap, beıbitshilik, jaqsylyq tiledi.

Keıin San-Frantsısko-dan kelgen Torbııa apa men Baıan apa tilegin aıtyp, sóz sóıledi. Jıylǵandardyń ishinde qazaqtarmen birge orystar jáne amerıkalyqtar boldy.

Ulttyq kıim kıgen Torbııa apa, Bahot apa men Maral apa belgili qazaq ánderin ózderi shyǵarǵan sózdermen oryndady. Jas ánshi Qaırat dombyranyń súıemeldeýimen án shyrqady.

Merekelik sharaǵa «Bolashaq» baǵdarlamasy boıyna bilimin jetildirip júrgen qazaqstandyq jýrnalıster Gúlnaz Álimgereı men Nurdilda Oraz, sonymen birge jýrnalıst Marat Seısekenov qatysty.

Shara sońynda qazaqtyń ulttyq taǵamdary qoıylǵan dastarhan jaıylyp, túrli ulttyq oıyndar oınatyldy.