Sáken Seıfýllın qoldanǵan kofe untaqtaǵysh tabylyp, mýzeıge qoıyldy
«Bıyl bizdiń mýzeı Sáken Seıfýllınniń mereıtoıy qarsańynda birqatar qundy dúnıemen tolyqty. Sonyń biri Sáken qoldanǵan kofe untaqtaǵysh (kofemolka), ol Qyzylordadan tabylyp, bizge ákelindi. 1928 jyly Sáken Seıfýllın Qyzylorda halyq aǵartý ınstıtýtyn basqarǵan. Odan bólek, birqatar qujat tabyldy, 1922 jyly QazKSR-di basqaryp turǵanda Jer kodeksin qabyldaǵan, sol qujat bar. Ol kezde jer kún tártibindegi mańyzdy máseleler qatarynda boldy. Sonymen qatar 1923 jyly 4 sáýirde avıatsııa týraly qabyldaǵan qujaty bizdiń mýzeıge qoıyldy», - dedi Marat Ábsemetov Sáken Seıfýllınniń 130 jyldyq mereıtoıyna arnalǵan is-shara barysynda.
Mýzeı basshysynyń aıtýynsha, avıatsııa týraly qujat qabyldaǵan soń elimizde áýe reısteri qatynaı bastaǵan.
«Orynbor-Oral, Aqmola-Semeı áýe reısterin ashqan. Sáken ózi ushqysh bolmasa da ushaq bortyna kóterilgen alǵash qazaq. Keıin Sáken Orynborda aeroklýb ashqan, sol klýbta Talǵat Bıgeldınov ıÝrıı Gagarın oqyǵan dep aıtýǵa bolady. Sondaı-aq, Sáken mýzykaǵa áýes bolǵan, A.Zataevıchtiń qazaqtyń 1000 án jınaǵyn shyǵaryp berdi, Abylaı han marshyn oryndap berdi, bir ókinishtisi Zataevıchtiń ánder jınaǵyna Sákenniń qylqobyzben oryndaǵan kúıleri enbeı qalǵan. 1964 jyly 24 tamyzda Dáýlet Myqtybaev degen kúıshi Sákenniń qylqobyzben tartqan «Saryarqa», «Áýpildek» kúılerin tapsyrǵan», - dep tolyqtyrdy tarıhshy.
Odan bólek, mýzeı dırektory bıyl Túrkııada (túrik tilinde) Sáken Seıfýllınniń mereıtoıyna oraı monografııa jaryq kórgenin aıtty.
Aıta keteıik, búgin elordada Sáken Seıfýllınniń 130 jyldyq mereıtoıyna arnalǵan «Aqyn, ult qaıratkeri – Sáken Seıfýllın» atty ádebı-mádenı kesh ótti. Іs-sharany Ulttyq mýzeı men Sáken Seıfýllın atyndaǵy qazaq agrotehnıkalyq zertteý ýnıversıteti birlesip uıymdastyrdy.
Eske sala ketsek, byltyr qazanda Sáken Seıfýllınniń buryn-sońdy jarııalanbaǵan vıdeosy tabylǵan edi.