Sáken Qalqamanov túrkistandyqtardyń muń-muqtajyn tyńdady

TÚRKІSTAN. QazAqparat - Túrkistan oblysy ákiminiń orynbasarlary aýdan, aýyl aralap, turǵyndardy jeke suraqtary boıynsha qabyldaýda. Halyqtyń muń-muqtajyn tyńdaý úshin oblys ákiminiń orynbasary Sáken Qalqamanov Keles aýdanynyń turǵyndaryn jeke máseleleri boıynsha qabyldady, dep habarlaıdy QazAqparat.

«Qarapaıym azamattardyń suranysy men usynystary – udaıy nazarda. Árqaısysynyń ótinish-usynysy, aryz-shaǵymy, arman-tilegi ártúrli. Kóbisi buǵan deıin talaı esikti qaǵyp, talaı tabaldyryqty tozdyrǵan. Endigi úmitteri aqtalý úshin keńes berip, naqty kómek usynamyz. Óıtkeni bári de arnaıy kelgendegi aıtqan máseleleri oń sheshimin tapsa eken deıdi», – dedi oblys ákiminiń orynbasary Sáken Qalqamanov.

Halyq túrli suraqtarmen keldi. Olardyń denin jumysqa ornalasý, aýlalardy abattandyrý, bıznesti ashýǵa nesıe alý, baspanamen qamtý jáne ózge de suraqtar mazalady. Keıbir máseleler birden sheshimin tapty.

«Árbir turǵynnyń máselesin muqııat tyńdaǵan oblys ákiminiń orynbasary kásipkerlik salasyndaǵy ońtaıly jobalardy túsindirip, kóterilgen ótinish-tilekterdiń oryndalýyna baılanysty aýdan ákimi men bólim basshylaryna birqatar tapsyrma berdi», - delingen Túrkistan oblysy ákimdiginiń málimetinde.