Sáken Qalqamanov bastaǵan Joldaýdy nasıhattaý toby kentaýlyqtarmen kezdesti

TÚRKІSTAN. QazAqparat - Prezıdent Qasym-Jomart Toqaevtyń Qazaqstan halqyna Joldaýynda qoıylǵan mindetterdiń mańyzyn ekshep, halyqqa keńinen nasıhattaý úshin Túrkistan oblystyq aqparattyq-nasıhat toby aýdan, qalalarǵa jolǵa shyqty, dep habarlaıdy QazAqparat.

Túrkistan oblysy ákiminiń orynbasary Sáken Qalqamanov bastaǵan nasıhattyq top Kentaý halqymen júzdesti. Alǵashqy kezdesý 1300 adamdy jumyspen qamtyp otyrǵan Kentaý transformator zaýytynda ótti. Oblys ákiminiń orynbasary óńirdegi bilim salasyn jetildirý men bala quqyǵyn qorǵaý, sondaı-aq daryndy balalardy qoldaý boıynsha atqarylatyn tyń jumystarǵa toqtaldy. Jıynda Qoja Ahmet ıAsaýı atyndaǵy Halyqaralyq qazaq-túrik ýnıversıtetiniń professory Kópjasar Jetpisbaev Joldaýda mindettelgen 5 baǵytty aıshyqtap, jeke-jeke toqtalyp ótti.

Kelesi júzdesý Kentaý qalasyndaǵy Sh.Qaldaıaqov atyndaǵy mádenıet saraıynda jalǵasty.

Memleket basshysynyń halyqqa alǵashqy Joldaýyn júzege asyrý jóninde Kentaý qalasynyń ákimi Daýren Mahajanov baıandama jasady. Shahar basshysy qala men aýyldardaǵy «Oqýshylar úıiniń» materıaldyq-tehnıkalyq bazalary eskirgendikten, tolyqtaı jańartylatynyn atap ótti. Sondaı-aq bala quqyǵyn qorǵaý komıssııasynyń quramy jańaryp, komıssııa jumysy ashyq ári ádil bolý úshin onda qoǵamdyq jumystarǵa belsene aralasatyn qoǵamdyq uıym ókilderi men blogerler tartylmaq.

Túrkistan oblysy ákiminiń baspasóz qyzmetinen málim etkendeı, Joldaý mátinin túsindirýge baǵyttalǵan kezdesýler aımaqtaǵy barlyq aýdandar men qalalarda ótýde.