Sáken Qalqamanov Arystaǵy órt týraly: Naýryz turǵyndary qaýipsiz aýmaqqa kóshkeni durys

ARYS. QazAqparat – Túrkistan oblysy ákiminiń orynbasary Sáken Qalqamanov Arys qalasyna qarasty Naýryz shaǵynaýdanynyń turǵyndaryn qaýipsiz aýmaqqa kóshýge shaqyrdy, dep habarlaıdy QazAqparat.

Sáken Qalqamanovtyń Facebook paraqshasyndaǵy málimetterge qaraǵanda, órtengen vagondarda 33 tonna sary fosfor bolǵan. Qazirgi tańda órt oqshaýlandy, alaıda órtengen aýmaqtan áli tútin shyǵyp jatyr. Tútin Arys qalasynyń Naýryz shaǵynaýdanyna qaraı tarap jatyr.

Sáken Qalqamanov sary fosfordyń qaýpine baılanysty jergilikti turǵyndardy aımaqtan qaýipsiz jerge ketýge shaqyrdy.

«Qazir biz Naýryz aýdanyndaǵy aýlalardy aralap, turǵyndardy qaýipsiz jerge ketýge shaqyryp jatyrmyz. Sary fosfordyń tútini óte qaýipti. Sondyqtan Arys turǵandaryn bılik ókilderiniń ótinishin nazarǵa alyp, densaýlyǵy men jaqyndaryn saqtandyrýǵa shaqyramyn»,-dedi ákimniń orynbasary.

Aıta keteıik, búgin Arys stantsııasynda shamamen keshki saǵat 18:30-dar shamasynda Jambyl oblysynan Reseıge jóneltilgen fosfor salynǵan eki konteıner órtendi.

Oblys ákimi baspasóz qyzmetiniń habarlaýynsha, tirkemede barlyǵy 64 vagon bolǵan.

Tótenshe jaǵdaımen kúreske 35 qyzmetshi, TJD-niń 6 tehnıkasy, 11 jumysker, 1 dana tehnıka men «QTJ» UK» AQ-nyń órt sóndirý poıyzy jumyldyrylǵan. Sondaı-aq osy jumystarmen polıtsııanyń 60 qyzmetkeri men 9 tehnıkasy, 8 áskerı qyzmetshi men Qorǵanys mınıstrligi 4489 áskerı bóliminiń 2 tehnıkasy qatysyp jatyr. Oǵan qosa sanıtarlyq-epıdemıologııalyq baqylaý basqarmasynyń 3 qyzmetshisi men 1 tehnıkasy bar.