Sáken Bıbosynov 10 jyldan keıin ǵana páterin óz atyna aýdara alady - ákimdik

<p>Túrkistan oblysynyń ákimdigi bokstan Tokıo olımpıadasynyń qola júldegeri, álem chempıony Sáken Bıbosynovqa berilgen páterge qatysty pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Áleýmettik jeli belsendileri sportshyǵa tabystalǵan páterdiń arendalyq ekenin aıtyp, jelide qyzý talqylap jatyr. Bul týraly biz de arnaıy aqparat bergen bolatynbyz. 

Al, búgin Túrkistan oblysy ákimdiginiń baspasóz qyzmeti boksshy Sáken Bıbosynovqa 2 bólmeli arendalyq páter berilgenin, ol páterdi tek 10 jyldan soń ǵana óz atyna aýdara alatynyn aıtty.

«Jańa baspana Olımpıada chempıondary men júldegerlerine turǵynjaı berý jáne ony paıdalaný qaǵıdalary negizinde kommýnaldyq turǵynjaı qory – turǵynjaılardy paıdalanýǵa berý jónindegi arnaıy memlekettik mekemege bekitilgen, jergilikti atqarýshy organdardyń qaraýyndaǵy turǵyn úıden berilgen.

Kórsetiletin qyzmetti alýshyǵa mynadaı sharttar belgilenedi: 

1) Olımpıadalyq, Paralımpıadalyq jáne Sýrdlımpıadalyq oıyndarda altyn medal jeńip alǵan chempıonǵa – úsh bólmeli páter;

2) Olımpıadalyq, Paralımpıadalyq jáne Sýrdlımpıadalyq oıyndarda kúmis medal jeńip alǵan júldegerge – eki bólmeli páter;

3) Olımpıadalyq, Paralımpıadalyq jáne Sýrdlımpıadalyq oıyndarda qola medal jeńip alǵan júldegerge – bir bólmeli páter.

Qujatqa sáıkes, kórsetiletin qyzmetti alýshymen shart 10 jyl merzimge jasalady. Shart jasasqan kúnnen bastap 10 jyl ótken soń kórsetiletin qyzmetti alýshylar kommýnaldyq turǵyn úı qorynan berilgen, ózderi turyp jatqan turǵynjaıdy óteýsiz negizde menshikke alady», - delingen ákimdik tarapynan berilgen aqparatta. 

Al, sportshy dopıngti qoldanǵan nemese paıdalanýǵa áreket jasaǵan jaǵdaıda sporttyq nátıje joıylǵanda, kórsetiletin qyzmetti alýshymen atalǵan qaǵıdalardyń 19 tarmaǵyna sáıkes 10 jylǵa jasalǵan shart buzylady. 

Kórsetiletin qyzmetti berýshi dúnıejúzilik dopıngke qarsy uıymnyń, Halyqaralyq olımpıada komıtetiniń, Halyqaralyq paralımpıada komıtetiniń, Sańyraýlardyń halyqaralyq sport komıtetiniń jarys hattamasyn jáne sporttyq nátıjeni joıý týraly resmı sheshimniń negizinde 3 jumys kúni ishinde kórsetiletin qyzmetti alýshyǵa shartty buzý týraly habarlama jiberýge mindetti.