Saqardan sabyn qaınatady: ShQO-lyq áje jasaǵan tabıǵı sabynnyń emdik qasıeti mol

<p>Shyǵys Qazaqstan oblysy Zaısan aýdanynda turatyn Bıbátıma Ybyraıhannyń ulttyq ádispen sabyn jasap júrgenine jarty ǵasyrdan asqan. Saqar sabyn kirdi jaqsy ketirip, bettegi bezeýge, qol-aıaq jarasyna em bolady. Jasy jetpiske taıaǵan ájeniń sabynyna elimizdiń túkpir-túkpirinen tapsyrys beretinder kóp, dep habarlaıdy<a href="https://kaz.inform.kz/" target="_blank" rel="noopener"> Kazinform</a>.</p>

Bıbátıma Ybyraıhan Zaısan aýdany Qaınar aýylynda turady. Sabyn jasaýdyń ulttyq ádisin sheshesinen úırengen. Bıyl 67-ge toldy, al saqardan sabyn qaınatyp júrgenine 51 jyl bolǵan.

«Ol kezde 16 jasta edim. Anamyz sabyn jasaýdyń qyr-syryna qanyqtyrdy. Buryn qazirgideı untaq degen bolmady ǵoı. Kirdi de sabynmen jýatynbyz, - deıdi. - Sabyn jasaý ádisine toqtalar bolsaq, áýeli alabota shóbin shaýyp, jınaımyz. Odan keıin ony órtep, kúlin sýǵa qaıtatamyz. Sodan shyǵatyn aq untaq saqar dep atalady. Saqarǵa sıyr nemese qoı maıyn qosyp 1 saǵattaı qaınatqan soń qalypqa salyp qatyryp qoıamyz. Sóıtip sabyn da daıyn bolady».

Tabıǵı sabynnyń emdik qasıeti mol. Máselen, jańa týǵan shaqalaqty qyrqynan shyqqansha úzbeı sabyn qosylǵan sýǵa shomyldyrsa talaı aýrýdyń aldyn alady. Ystyǵy kóterilse sabyndy shekesine, qulaqtyń aldyna, eki ókpesine jaǵý kerek. Sonda ystyǵy dereý basylady.

«Keıbir adamdarda basy qyshyp, shashy túsip jatady. Sonda basty osy sabynmen jýý kerek. Allergııaǵa da jaqsy. Bettegi bezeýge, qol-aıaq jarasyna em bolady. Aıta berseń kóp. Eshqandaı qospa joq, taza ónim bolǵandyqtan paıdasy zor. Mal jarasyna jaǵýǵa da keledi», - deıdi Bıbátıma Ybyraıhan.

Tas sııaqty qatty sabyn sý tıse jyldam erip, jup-jumsaq bolady. Betine kútim jasaıtyn áıelder osy sabynmen jýynǵannan keıin bet terisiniń jumsaryp, ajarlanyp qalatynyn aıtady eken. Kólik jóndeıtin azamattar bolsa, maılanǵan qoldy dúkenniń sabyny durys tazartpaıtynyn, al saqardan jasalǵan osy sabynnyń maıdy dereý ketiretinin aıtypty.

«Sabyn jasaýǵa 2 saǵattaı ýaqyt ketedi. Bir jasaǵanda 30 sabyn shyǵady. Tapsyrysqa baılanysty jasap turamyn. Qazir maı qymbattap ketkendikten ózim de baǵany kóterdim. Bir sabyn – 2000 teńge. Eger 30 sabynnan joǵary alsa, onda 1500 teńgeden satamyn», - deıdi sabyn jasaýshy.

Qaınar aýylynda jasalatyn sabynǵa oblystaǵy qala, aýyl halqynan bólek Astana, Almaty, Qaraǵandy, Aqtóbe qalalarynan tapsyrys túsip turady. Kóbi 50 sabynnan satyp alady eken. Áje sabyndy olarǵa poshta arqyly salyp jiberedi.

«Eshqaı jerge jarnama jasamaımyn. Internet degendi múlde bilmeımin. Halyq bir-birinen estip, habarlasyp jatady. Maǵan osyndaǵy eki ulym kómektesedi. Olarǵa da sabyn qaınatýdy úırettim. Jalpy ózimniń 9 balam bar. 24 nemere, 2 shóbere súıip otyrmyn», - deıdi Bıbátıma Ybyraıhan.

Foto: B. Ybyraıhannyń jeke muraǵatynan