Saǵyntaev Jambyl oblysynda IIDMB jobalarynyń iske asyrylýymen tanysty

ASTANA. QazAqparat - Jambyl oblysyna jumys sapary barysynda Premer-Mınıstr Baqytjan Saǵyntaev óńirdiń iri júıe quraýshy kásiporny - QR Indýstrııalyq-ınnovatsııalyq damý memlekettik baǵdarlamasy aıasynda iske asyrylyp jatqan «Qazfosfat» JShS Qazaqstandaǵy jalǵyz mıneraldy tyńaıtqyshtar zaýytyn aralap kórdi, dep habarlaıdy primeminister.kz .

Hımııa zaýyty aýyl sharýashylyǵyna arnalǵan mıneraldy tyńaıtqyshtar, jemshóptik ftorsyzdandyrylǵan fosfattar óndiredi. Baqytjan Saǵyntaevqa óndiristiń qazirgi kórsetkishteri, sondaı-aq eksport kólemin arttyrý týraly baıandaldy.   

«Qazfosfat» JShS bas dırektory Muqash Eskendirovtiń aıtýynsha, IIDMB aıasynda 2016 jyly zaýytty qaıta jóndeý óndiris kólemin 2 esege arttyrýǵa múmkindik berdi. 2017 jyly 300 myń tonna fosforly mıneraldy tyńaıtqyshtar óndirildi, olardyń 108 myń tonnasy Qazaqstannyń qajettilikterin 100% qamtı otyryp, ishki naryqta ótkiziledi.

200 myń tonnaǵa jýyǵy Qytaı, Aýǵanstan, Reseı, Ýkraına, Ýrýgvaı, Argentına elderine eksporttalady. Rýmynııa, Chehııa, Bolgarııa, Iran naryqtaryn ıgerý jumystary júrgizilip jatyr.

Keler jyly fosforly mıneraldy tyńaıtqyshtar óndirisi kólemin 500 myń tonnaǵa deıin ulǵaıtý josparlanǵan.

Óz kezeginde Jambyl oblysy ákiminiń orynbasary Tımýr Janke IIDMB Indýstrııalandyrý kartasy aıasynda 2017 jyly óńirde 1448 jańa jumys ornyn qura otyryp, 18,8 mlrd teńge somaǵa 13 jobany iske asyrý josparlanǵanyn baıandady. Jyl basynan beri 8,3 mlrd teńge somaǵa 6 joba engizildi, 398 jumys orny quryldy. 

Jalpy elimizde bıyl 10 aıda ekonomıkanyń barlyq bazalyq salalary boıynsha óndiris ósimi baıqalǵan. Ónerkásip kórsetkishteri ótken jyldyń uqsas kezeńimen salystyrǵanda 7,5% jaqsardy, onyń ishinde Jambyl oblysy boıynsha ósim 1,4% qurady.

Aıta keteıik, Úkimet basshysy Baqytjan Saǵyntaev 2017 jyldyń 17 qarashasynda Jambyl oblysyna jumys saparymen barǵan edi. Sapar barysynda ol birqatar áleýmettik jáne ónerkásiptik nysandardy aralady. Premer-Mınıstr «Araı» shaǵyn aýdanynyń kópqabatty turǵyn úıleriniń qurylysy mysalynda óńirdegi «Nurly jer» turǵyn úı qurylysy baǵdarlamasynyń iske asyrylý barysymen tanysty. Sondaı-aq, Úkimet basshysy oblystyq perınataldyq ortalyǵynda bolyp, óńirdiń densaýlyq saqtaý júıesinen habardar boldy.