Saǵyntaev: «Shyryldaýyq shegirtkedeı» kúz túskende jumys júrmeı qalmasyn

  ASTANA. QazAqparat - Úkimet basshysy Baqytjan Saǵyntaev jyl basynan bergi 8 aıdyń áleýmettik-ekonomıkalyq damý qorytyndysy men bıýdjet qarajatynyń ıgerilýi turǵysynda kemshilik jibergen mınıstrler men óńir basshylaryna eskertý jasady, dep habarlaıdy QazAqparat tilshisi. 

«Birqatar óńirlerdiń baıandamasyn, esebin tyńdadyq. Taǵy da qosymsha ýádelerin aldyq. Degenmen, Elbasynyń tapsyrmasy boıynsha ósim 4 paıyzdan (JІÓ kórsetkishi - avt.) tómen bolmaýy kerek. 8 aıdyń qorytyndysy 3,8 paıyzdy kórsetip otyr. Tımýr Muratulynyń (Súleımenov - avt.) baıandamasynda kórsetilgendeı, jyldyń sońyna deıin 4 paıyzben aıaqtaý úshin biz 4 aıdyń kóleminde 4,2 paıyzben ósýimiz kerek. Jumys kúrdelendi. Belgili mysaldaǵydaı «ala jazdaı án salyp, shyryldaǵan shegirtkedeı» kúz túskende dirildep, jumysymyz júrmeı qalyp júrmesin. Negizgi másele - tamyz aıyndaǵy jumystyń júrmeýinde. Bosańsyp kettik. Sol sebepten, Elbasynyń tapsyrmasyn oryndap, jyldy jaqsy kórsetkishpen aıaqtaý kerek», - dedi Saǵyntaev búgingi Úkimet otyrysynda.

Úkimet basshysy osy sebepti óńir basshylaryna mán-jaıdy anyqtap, jumysyn tıisti dárejede atqarmaǵan basshylardyń jaýapkershiligin qaraýdy tapsyrldy.

«Qabyldanǵan sharalar men tártiptik jazalar týraly aqparat bir aptanyń ishinde Premer-mınıstr keńsesine tapsyrylatyn bolsyn. Ulttyq ekonomıka mınıstrligi, múddeli memlekettik organdarmen Premer-mınıstrdiń keńsesimen birige otyryp, memlekettik organdar, kvazımemlekettik sektor, «Atamekenmen» birlese otyryp, selektorlyq keńes ótkizýdi tapsyramyn», - dedi Baqytjan Saǵyntaev.