Saǵyntaev «Shevron» kompanııasynyń basshysymen kezdesti

ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev «Shevron» kompanııasynyń dırektorlar keńesiniń tóraǵasy Maıkl Ýırtpen kezdesý ótkizdi. Bul týraly primeminister.kz habarlaıdy. 

Kezdesý barysynda Elbasynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýyn iske asyrý aıasynda Qazaqstan ekonomıkasyna jańa tehnologııalardy engizý, tsıfrlandyrý salasynda jańa ınvestıtsııalyq jobalardy iske asyrý jáne kompanııamen aradaǵy yntymaqtastyq máseleleri talqylandy.

Anyqtama: «Shevron» kompanııasy «Pacific Oil Coast Co» ataýymen 1879 jyly qurylǵan. Búginde ol - álemdegi besinshi iri ıntegratsııalanǵan energetıkalyq kompanııa jáne Kaspıı aımaǵynda jumys isteıtin jetekshi jeke munaı óndirýshi. Kompanııa munaı men gazdy óndirýmen jáne óńdeýmen, munaı hımııasymen, elektr energııasyn óndirýmen aınalysady, geotermaldyq energııa jáne bıootyn salasynda jumys júrgizedi.

Shtab-páteri San-Ramon qalasynda ornalasqan (Kalıfornııa, AQSh), operatsııalary álemniń 180 elinde júrgiziledi. Qyzmetkerler sany shamamen 62 myń adam. Kompanııa kapıtaly $232 mlrd quraıdy.

«Shevron» kómirsýtekterin barlaý jáne óndirý boıynsha 20-dan astam elde (Qazaqstan, AQSh, Avstralııa, Kanada, Qytaı, Brazılııa, Argentına, Taıland, Nıgerııa, Angola, Kongo, Ulybrıtanııa jáne t.b.) jumys isteıdi.

Qazaqstanda Chevron kompanııasy «Teńizshevroıl» JShS, Qarashyǵanaq jobasyna jáne Kaspıı qubyr konsortsıýmyna qatysady.