Saǵyntaev sheteldikterdi qazaqstandyq kompanııalardyń ıesi atanýǵa shaqyrdy
11:19, 05 Jeltoqsan 2017
ASTANA. QazAqparat - Elordada ótip jatqan «Kazakhstan Global Investment Roundtable» forýmynda QR Premer-Mınıstri Baqytjan Saǵyntaev ınvestorlardy jekeshelendirýge qatysýǵa shaqyrdy, dep habarlaıdy QazAqparat.
«Investorlar úshin qazirgi ýaqytta Qazaqstanda júrgizilip jatqan jekeshelendirýdiń aýqymdy ekinshi tolqyny zor múmkindikter beredi. Úkimet ekonomıkany memleket ıeliginen alý baǵytyn júzege asyrýda», - dedi Baqytjan Saǵyntaev.
Premer-Mınıstr qazirgi ýaqytta elimizde 900-den astam kompanııa básekelestik ortaǵa beriletindigin atap ótti.
«Barynsha tartymdysy memleket menshigindegi jáne kvazımemlekettik sektordaǵy 65 úzdik kompanııa sanalady. Onyń 57-si - ulttyq holdıngter. Men sizderdi atalǵan jekeshelendirýge qatysýǵa shaqyramyn. Búginde barynsha tıimdi kezeń týyp otyr. Biz bul taqyrypqa jeke sessııa arnaımyz», - dedi Mınıstrler kabınetiniń basshysy.