Saǵyntaev «Nátıjeli jumyspen qamtý» baǵdarlamasynyń kemshilikterin toqsan saıyn túzetýdi tapsyrdy

ASTANA. QazAqparat - Nátıjeli jumyspen qamtý jáne jappaı kásipkerlikti damytý baǵdarlamasy sátti bastaldy. Mundaı pikirdi búgin Úkimettiń selektorlyq rejimdegi otyrysynda QR Premer-Mınıstri Baqytjan Saǵyntaev bildirdi, dep habarlaıdy QazAqparat.

«Aqtóbe oblysynda  is-saparmen bolǵan kezde áleýmettik jańǵyrtý boıynsha  búgingi kóterilip otyrǵan másele jan-jaqty talqylandy. Ol kezde jurtshylyq tarapynan aıtylǵan máselelerden, búgingi baıandamalardan, ákimderdiń esebinen kórip otyrǵanymyzdaı, jergilikti jerlerde baǵdarlamanyń  sátti bastalǵany  aıqyn. Sol sebepti de jumysty odan ary jandandyrýymyz qajet. Tamara Qasymqyzy (Eńbek jáne halyqty áleýmettik qorǵaý mınıstri Dúısenova)  ár toqsan saıyn qorytyndysyn qarap,  kemshilikteri bolsa túzep, búgingi aıtylǵan usynystardyń bárin júzege asyrýǵa tyrysý kerek», - dedi Úkimet basshysy.

Aıta keteıik, Úkimet otyrysynda Eńbek jáne halyqty áleýmettik qorǵaý mınıstri Tamara Dúısenova Nátıjeli jumyspen qamtý jáne jappaı kásipkerlikti damytý baǵdarlamasy qatysýshylarynyń sany 80 myń adamǵa jetkenin málim etken bolatyn.  

Jalpy Memleket basshysy Nursultan Nazarbaevtyń tapsyrmasyna  oraı QR Úkimeti ázirlegen Nátıjeli jumyspen qamtý jáne jappaı kásipkerlikti damytýdyń baǵdarlamasynyń maqsaty - nátıjeli jumyspen qamtýǵa jaǵdaı jasaý arqyly halyqqa óz tabystaryn arttyrýǵa múmkindik berý. Baǵdarlamamen  15 pen 45 jas aralyǵyndaǵy 550 myńǵa jýyq adam qamtylady. Olardyń 84 paıyzy aýyl turǵyndary bolmaq.