Saǵyntaev Qazaq tili álipbıin latyn grafıkasyna kóshirý jónindegi ulttyq komıssııanyń otyrysyn ótkizdi
Otyrys aıasynda qazaq álipbıin 2025 jylǵa deıin latyn grafıkasyna kezeń-kezeńmen kóshirý jónindegi sharalar josparyn iske asyrý barysy qaraldy, sondaı-aq, jańa álipbıdiń emle erejeleri men pernetaqtanyń tehnıkalyq ornalasýyn ázirleý boıynsha jumysty odan ári úılestirý máseleleri talqylandy.
Qazaq tili álipbıin latyn grafıkasyna kóshirý jónindegi ulttyq komıssııa - Úkimet janyndaǵy konsýltatıvtik-keńesshi organ, onyń negizgi maqsaty - qazaq álipbıin latyn grafıkasyna kóshirý boıynsha usynystar ázirlep bekitý, jumys barysyn úılestirý jáne onyń sapaly oryndalýyna baqylaý jasaý.
Álipbıdi latyn grafıkasyna kóshirý aıasynda júrgizilip jatqan jumystyń negizgi baǵyttary boıynsha mádenıet jáne sport mınıstri A. Muhamedıuly, bilim jáne ǵylym mınıstri E. Saǵadıev, aqparat jáne kommýnıkatsııalar mınıstri D. Abaev baıandama jasady.
A. Muhamedıuly búginde til mamandarynyń qatysýymen jumys toby Latyn grafıkasy negizinde qazaq álipbıiniń emle tujyrymdamasyn ázirlegenin atap ótti.
«Qazirgi tańda qazaq tiliniń orfografııasy men emle erejeleriniń negizgi tártipterin ázirleý boıynsha kúntizbelik jospardyń kestesi daıyndaldy. Jalpy, elimiz úshin mańyzdy til reformasy qazaq álipbıin 2025 jylǵa deıin latyn grafıkasyna kezeń-kezeńmen kóshirý jónindegi sharalar josparyna sáıkes júzege asyrylyp jatyr», - dedi A. Muhamedıuly.
E. Saǵadıev búgingi tańda A. Baıtursynov atyndaǵy Til bilimi ınstıtýtynyń qazaq jáne túrki tilderindegi termın jasamynyń halyqaralyq qaǵıdalary men erejelerin zerttep, ulttyq termınologııa krıterıılerin ázirlegenin habarlady.
Otyrys barysynda, sondaı-aq, Premer-Mınıstrdiń orynbasary E. Dosaev, Parlament Senatynyń depýtaty M. Baqtııaruly, Parlament Májilisiniń depýtaty B. Mamraev, Til bilimi ınstıtýtynyń dırektory E. Qajybek, fılologııa ǵylymdarynyń doktory, Abaı atyndaǵy Qazaq ulttyq ýnıversıtetiniń kafedra meńgerýshisi T. Aıapova, Sh. Shaıahmetov atyndaǵy «Til-Qazyna» Ulttyq ǵylymı-praktıkalyq ortalyǵynyń atqarýshy dırektory E. Tileshov jáne t.b. pikir bildirdi.