Saǵyntaev Almatynyń «jasyl» aımaqqa ótýine qatysty: Bosańsýǵa áli erte

ALMATY. QazAqparat – Almaty «jasyl» aımaqqa ótti, degenmen bosańsýǵa áli erte. Bul týraly qala basshysy «Almaty» telearnasyndaǵy Akimat LIVE baǵdarlamasynyń tikeleı efıri kezinde aıtty, dep habarlaıdy QazAqparat tilshisi.

«Almaty «jasyl» aımaqqa kóshti, biraq bul koronavırýs ınfektsııasy dertiniń jańa tolqynynyń qaýipti ekenin joqqa shyǵarmaıdy. Búginde Almatyda KVI boıynsha epıdemıologııalyq ahýaldyń turaqtanýy jalǵasýda. Bul ujymdyq ımmýnıtettiń 56,2 paıyzǵa jetip, shekteý sharalary men karantın talaptaryn saqtaýdyń arqasynda múmkin boldy», - dedi ol.

Onyń aıtýynsha, koronavırýs boıynsha epıdemıologııalyq ahýaldy turaqtandyrý úshin «sary» aımaqtaǵy talaptardy saqtaýdy «jasylǵa» kóshkennen keıin keminde 7 kún boıy jalǵastyrý qajet.

Obektiler men qoǵamdyq oryndardaǵy «sary» aımaqtyń talaptary 21 qarashaǵa deıin saqtalady.

Almaty ákimi Baqytjan Saǵyntaev qala turǵyndaryn COVID-19 qaýipti ekenin umytpaýǵa shaqyrdy.

«Eýropa elderinde, sondaı-aq Reseıde derttiń jańadan órshýi baıqalady. Eger almatylyqtar sanıtarlyq-epıdemıologııalyq qaýipsizdik sharalaryn saqtamasa jáne vaktsınalanýdy jalǵastyrmasa, onda KVI dertiniń jańa tolqynynyń qaıtalaný qaýpi saqtalady»,- deıdi Baqytjan Saǵyntaev.