Saǵyntaev: Almatyda aýanyń sapasyn baqylaıtyn táýelsiz monıtorıng toby qurylady

ALMATY. QazAqparat – Almaty ákimi Baqytjan Saǵyntaev halyqpen esepti kezdesýinde ekologııaǵa qatysty túıtkildi máselege nazar aýdardy, dep habarlaıdy QazAqparat tilshisi.

Onyń aıtýynsha, turǵyndardyń 60-70%-yn osy másele alańdatady.

«JEO kómirden gazǵa aýystyrý tarıfke áser etedi. Osy jumyspen aınalysqan sarapshylar «halyq bul qyzmettiń qymbattaýyna daıyn ba?» degen suraq qoıdy. Olar oǵan basyn aýyrtpasyn. Men aıtqanymdaı, 2012 jyldan bastap avtobýs marshrýttaryn sýbsıdııalap kelemiz. Ár turǵyn 80 teńgemen qalanyń kez kelgen núktesine barý úshin. Eger kerek bolsa, bıýdjet buǵan da barady. Eń aldymen muny qalaı júzege asyramyz, biz sony oılaýymyz kerek. Jańa JEO salyna ma, joq eskisi gazǵa aýysa ma osy máseleni anyqtap alýymyz kerek», - dedi ákim.

Qala ákimi ákimdikte iskerlik keńes qurylǵanyn habarlady. Bul keńestiń ishindegi ekologııalyq komıtet osy suraqtarmen tikeleı aınalysatyn bolady.

«Avtoókólikterge kelsek, kezinde osy baǵytta strategııa qabyldandy. Qazir bul salaǵa Máskeýden mamandar tartyp jatyrmyz. Qala kóshelerin qalaı jeńildetýge bolady? Qytaıdaǵydaı jup jáne taq sandy nómirlerge arnaıy kún belgileımiz be? Álde Londonnyń ortalyǵy sııaqty qymbat qylamyz ba? Osynyń bárin talqylaýdan soń bir toqtamǵa kelemiz», - dedi ákim.

Qala basshysy aýanyń lastyǵyn baqylaıtyn táýelsiz monıtorıng toby qurylatynyn aıtty.