Saǵadat Nurmaǵambetovti eske alý týrnıriniń jeńimpazdary anyqtaldy

NUR-SULTAN. QazAqparat - Almatydaǵy TsSK oqý-jattyǵý ortalyǵynyń bazasynda Táýelsiz Qazaqstannyń alǵashqy Qorǵanys mınıstri, Keńes Odaǵynyń Batyry, Halyq qaharmany, armııa generaly Saǵadat Nurmaǵambetovti eske alýǵa arnalǵan bokstan 23-shi halyqaralyq týrnır aıaqtaldy. Bul jaıynda elimizdiń Qorǵanys mınıstrliginen málim etti, dep habarlaıdy QazAqparat tilshisi.

Búginde dástúrge aınalǵan bul jarystyń halyqaralyq mártebesi bar. Bıylǵy týrnırge Qazaqstan, Qyrǵyzstan, Mońǵolııa, Reseı,Tájikstan jáne Ózbekstannan 150-den astam boksshy qatysyp, birneshe kún boıy ár salmaq sanatyndaǵy myqtylardy anyqtady.

"Osynaý bokstan halyqaralyq týrnırdi aty ańyzǵa aınalǵan adamdy eske alýǵa arnaımyz. Qazirdiń ózinde bul jarystyń óz tarıhı men dástúri bar. Saǵadat Nurmaǵambetov búkil ómirin Otanyna qyzmet etýge arnaǵan adam. QR Qarýly Kúshteriniń Joǵarǵy Bas qolbasshysynyń basshylyǵymen ol qazirgi Qarýly kúshterimizdiń irgesin qalady. Mundaı adamdardy máńgi este saqtaý kerek, umytýǵa bolmaıdy. Kez kelgen sportshy úshin týrnırge qatysý jáne jeńiske jetý úlken maqtanysh ári abyroı", - dedi Armııa ortalyq sport klýbynyń bastyǵy A.Qurǵambaev.

Týrnır qorytyndysynda elordalyq Aıdarhan Nuqanov úzdik boksshy atandy. Al salmaq sanattary boıynsha jambyldyq Asqar Qaısar (49 keli), almatylyq Bereke Smalı (52), almatylyq Almaz Nurǵalı (56), shyǵysqazaqstandyq Beknur Ojanov (60), ózbekstandyq Djahongır Rasýlov (64), elordalyq Aıdarhan Nuqanov (69), QR QM TsSKA sport klýbynyń boksshysy Saparbaı Aıdarov (75), Almaty oblysynyń sportshysy Erkebulan Ákimbaı (81), TsSKA boksshysy Muhamedjan Erkin (91) jáne reseılik Anleksandr Sıdorın (91 keliden joǵary) týrnır jeńimpazy boldy.

Aıta keterligi, osy básekeniń jeńimpazdary bıyl 8-14 shildede Nur-Sultan qalasynda ótetin QR Prezıdenti kýbogyna arnalǵan týrnırge, 2019 jyldyń 6-29 qyrkúıegi aralyǵynda Reseıdiń Ekaterınbýrg qalasynda ótetin álem chempıonatyna kandıdat retinde qarastyrylady.