Sadrıddın Ahmedov álem reıtınginde 116 satyǵa joǵarylady

ASTANA. QazAqparat - Kásipqoı boksta kezekti jeńisine qol jetkizgen qazaqstandyq boksshy Sadrıddın Ahmedov (7-0, 7 KO) álem reıtınginde joǵarylady, dep habarlaıdy QazAqparat Sports.kz-ke silteme jasap.

Kanadanyń Monreal qalasynda ótken boks keshiniń anderkartynda 20 jastaǵy Ahmedov meksıkalyq Abraham Hýarespen (13-2, 5 KO) kezdesken edi. Qazaqstandyq tórtinshi raýndta qarsylasyn nokaýtpen jeńip, jastar arasynda birinshi orta salmaq sanatyndaǵy WBC chempıony atandy. Keıin Sadrıddın Feısbýktegi paraqshasynda bul jeńisin kimge arnaıtynyn jazdy.

Osy jeńisten keıin BoxRec.com portaly jasaǵan álem reıtınginde Ahmedov óz dıvızıonynda birden 116 saty joǵarylap, 85-orynnan bir-aq kórindi. Osylaısha ol 80-orynda turǵan taǵy bir qazaqstandyq boksshy, WBC Asia beldiginiń ıesi Nursultan Jańabaevqa (6-0, 4 KO) bir taban jaqyndaı tústi.