Sadyr Japarov Qyrǵyzstannan jasyryn altyn shyǵarý týraly vıdeony feık dep atady
Áleýmettik jelide taraǵan vıdeoda qyrǵyz altyny shetelge jasyryn shyǵarylǵany jáne buǵan prezıdenttiń úlken aǵasy Sabyr Japarovtyń qatysy bar ekeni aıtylǵan.
«Bul vıdeony alǵash kórgende meniń kúlkim keldi. Altyn urlap, ony shetelge shyǵaryp jatqandar osyndaı vıdeony ózderi túsirip, áleýmettik jelige tarata ala ma? Búginde elimizdegi memlekettik altyn kenishterinen bir tonna túgili, bir gramm da altyn urlaý múmkin emes», – dep jaýap berdi Sadyr Japarov.
Onyń aıtýynsha, barlyq memlekettik altyn kenishteri men Qara-Baltadaǵy affınaj zaýytynda beınekameralar ornatylǵan. Beıne táýlik boıy túsirilip, kompıýterge jazylady. Aǵalary men otbasyna qatysty saýalǵa jaýap bergen Sadyr Japarov olardyń shetelge eshnárse eksporttamaıtynyn, kerisinshe elge shetelden ákeletinin atap ótti.
«Men qansha ýaqyt Prezıdent bolatynymdy bilmeımin, ony tek bir Qudaı ǵana biledi. Prezıdenttik merzimim aıaqtalyp, qyzmetten ketetin bolsam, men ǵana emes, meniń týystarym men balalarymnyń árqaısysy bizdiń elge ınvestıtsııa retinde qansha jáne qaıdan qarajat tartqany, qandaı mekemeler salǵany, qansha aqsha salǵany, Qyrǵyzstanǵa qandaı paıda ákelgeni týraly esep beredi», - dep atap ótti ol.
Mysal retinde Qyrǵyz Respýblıkasynyń Prezıdenti altyn óndirý salasyndaǵy paıda týraly statıstıkalyq derekterdi keltirdi. Aıtýynsha, «Qyrǵyzaltyn» kompanııasynyń 2020 jylǵa deıingi taza tabysy nebári 340 mıllıon som bolsa, 2023 jyly 12 mıllıard 600 mıllıon somǵa jetken. Mundaı kórsetkishter tek «Qyrǵyzaltyn» men «Qumtorda» ǵana emes, keden jáne salyq júıesinde de ósken.
Táýelsizdik alǵannan beri 2020 jylǵa deıin ulttyq qor bar bolǵany 16 tonnaǵa jetti. Búginde respýblıkalyq qor – 52 tonna. Bul sońǵy úsh jyldaǵy ǵana jetistik. Jyl sońyna deıin bul sandar áli de artady, degen Sadyr Japarov jalǵan vıdeolarǵa senbeýge shaqyrdy.
«Ýaqyt bárin óz ornyna qoıady. Endi jasandy ıntellekt kómegimen kez kelgen adamnyń daýysyna elikteıtin beınerolık jasaýǵa bolady», - dep atap ótti ol.