Sádibek Túgeldiń saılaýaldy shtaby elordalyq saıabaqta kontsert ótkizdi

NUR-SULTAN. QazAqparat - Elordadaǵy «Jeruıyq» saıabaǵynda QR Prezıdenttigine kandıdat Sádibek Túgeldi qoldaýǵa arnalǵan kontsert ótkizildi. Bul týraly úmitkerdiń baspasóz qyzmeti habarlady.

QR Prezıdenttigine úmitker Sádibek Túgel kontsertke jınalǵan qala turǵyndary men qonaqtary aldynda sóz sóılep, alǵys aıtty. Jınalǵan kópshilikke óziniń saılaýaldy baǵdarlamasyn tanystyryp ótti.

Kontsertte QR mádenıet qaıratkeri Qaırat Ahmetov, tanymal ánshi, Polsha Respýblıkasynyń mádenıet qaıratkeri Bıbigúl Ysqaqova elorda, týǵan jer jaıly patrıottyq ánder shyrqady.

Sonymen qatar, belgili ıllıýzıonıst Kárim Mutyrǵanov, qalalyq karate federatsııasynyń sportshylary óner kórsetti. Jınalǵandar aqyn Dıdar Oralbekulynyń «Jeruıyǵy elimniń» atty óleńin naqyshyna keltirip oqyǵan belgili ardager dıktor Kúlásh Moldahmetovanyń ónerine qol soǵyp, ystyq yqylastaryn bildirdi. Qoldaý kontsertin QR Prezıdenttigine kandıdat Sádibek Túgeldiń Nur-Sultan qalasyndaǵy saılaýaldy shtaby uıymdastyrdy.