Sádibek Túgel saılaýaldy baǵdarlamasyn jarııa etti
«Uly Dala Qyrandary» qoǵamdyq birlestiginiń atynan saılaý dodasyna túsip otyrǵan Sádibek Túgel eshqandaı partııaǵa qatysy joqtyǵyn alǵa tartady. Ana tildiń mártebesin kóterý maqsatynda ol barlyq jerde tek memlekettik tilde sóıleýge bekingen.
«Uly Dala Qyrandary» halyqtyq qozǵalysynyń urandary men ustanymdary:
«Ulaǵatty urpaq - ulttyq ustanym!»
«Aýyl - altyn besigimiz!»
«Jemqorlyqqa tosqaýyl qoıamyz!»
«Biz qyrandarmyz - biz birgemiz!»
«Jer - janymyz, til-tuǵyrymyz!»
«Uly Dala Qyrandary» respýblıkalyq qoǵamdyq mádenı-áleýmettik qozǵalysy ar-namysqa, demografııaǵa, shet elderde turatyn qandastarymyzdyń atamekenge emen-erkin kelýlerine, memlekettik tildiń mártebesin óz deńgeıine jetkizip, tolyq qoldanysqa engizýge, Alashordanyń ıdeıalaryn jańǵyrtýdy qolǵa alýǵa, jemqorlyqpen kúresti pármendi júrgizýge, «Bıler sotyn» engizýge zor kóńil bólmek.
Eske sala ketsek, keshe QR Prezıdenttigine kandıdat Qasym-Jomart Toqaev Respýblıkalyq qoǵamdyq shtabqa kelip, qyzmetkerlermen kezdesken bolatyn.
Al, QR Prezıdenttigine kandıdat Jambyl Ahmetbekov resmı saıtynda saılaýaldy tuǵyrnamasyn jarııalady.
Sonymen qatar, keshe «Aýyl» xalyqtyq-demokratııalyq patrıottyq partııasynyń saılaýaldy shtabynda jıyn ótti. Onda prezıdenttikke kandıdat Tóleýtaı Raqymbekov óziniń saılaýaldy tuǵyrnamasyn tanystyrdy.
Úmitkerler halyqpen kezdesip, daýys jınaý úshin úgit-nasıhat jumystaryna kirisken. Atap aıtqanda, «Aq jol» partııasynan úmitker Danııa Espaeva Almaty bazarynda jumys isteıtin kásipkerlermen kezdesti.
Al Ámirjan Qosanov saılaýaldy shtabymen Soltústik Qazaqstandy aralap júr.