Sábıt Muqanovtyń mereıtoıyna oraı jazýshynyń mýzeı-úıi jóndeýden ótpek

PETROPAVL. QazAqparat – Soltústik Qazaqstan oblysynda Sábıt Muqanovtyń 120 jyldyq mereıtoıyna oraı bıyl jazýshynyń mýzeı-úıi jóndelip, «Kıeli jerler» jobasy aıasynda týrıstik baǵyttar ashylmaq, dep habarlaıdy QazAqparat tilshisi.

SQO Jambyl aýdany Sábıt aýylynda jazýshynyń qurmetine 1990 jyly ádebı-memorıaldyq mýzeı-úıi ashylǵan bolatyn. Bul nysan óńirdiń kıeli jerleriniń kartasyna engen.

Bir qabatty aǵash úıdi S.Muqanov Blagoveşenka eldi mekenindegi kópesterdiń birinen satyp, 1959 jyly Sábıt aýylyna ákelip salady. 180 sharshy metrdi alyp jatqan ǵımarat bes bólmeden: jatyn bólme, qonaqjaı, as jáne qonaq bólmeleri, kireberisten turady. Búginde memorıaldy mýzeıden jazýshynyń jeke zattaryn, biregeı qoljazbalaryn, shyǵarmalaryn kórýge bolady. Jalpy 600-den astam jádiger saqtalǵan.

«Jergilikti mańyzy bar nysan ınfraqurylymmen tolyq qamtylǵan. Qazirgi tańda ǵımaratty jónge keltirýge jobalyq-smetalyq qujattar ázirlendi. Qarajat bólingen jaǵdaıda aǵymdaǵy jóndeý jumystary júrgiziledi. Bıyl «Kıeli jerler» jobasy aıasynda osy Jambyl aýdanyna jáne Aıyrtaý aýmaǵyna týrıstik baǵyttar ashýdy josparlap otyrmyz», - deıdi SQO Tabıǵı-mádenı murany qorǵaý jáne paıdalaný ortalyǵynyń dırektory Raqat Mámbetalınov.

SQO-da sáýlet jáne qala qurylysyna qatysty 162 eskertkish bar, onyń 105-i Petropavl qalasynda ornalasqan. 124-i memlekettiń menshiginde bolsa, 6-ýy qoldanysta, qalǵany jekemenshiktiń qolynda.

«Olardyń basym bóliginiń jaǵdaıy qanaǵattanarlyq bolǵanymen, úsheýine kúrdeli jóndeý qajet. Solardyń biri HIX ǵasyrdyń ekinshi jartysynda boı kótergen kópes Shýlepovtyń úıi. Qazir QR UQK shekara qyzmetiniń 2032 áskerı bólimshesiniń balansynda tur. Olar ǵımaratty jónge keltirý boıynsha jumys josparyn usyndy.

Ekinshisi HIX ǵasyrdyń sońynda salynǵan kóship-qoný beketi. Buryn Petropavl qalalyq Qorǵanys isteri basqarmasyna qaraǵan. Qazir qalalyq turǵyn úı-kommýnaldyq sharýashylyq bólimine berilip jatyr.

Úshinshisi 1907 jyly salynǵan kópes Dmıtrıevtiń úıi. Ony ıesi bankke kepilge qoıyp, ózi qaıtys bolǵan. Sol sebepti qazir ǵımaratty ıesiz dep taný boıynsha jumystar júrgizilip jatyr. Buzaqylardan saqtaý úshin ǵımarat qorshaýǵa alyndy», - deıdi Raqat Mámbetalınov.

Jalpy bıyl SQO-da sáýlet-qala qurylysy eskertkishteriniń ishinen kópes Shafeevtiń úıi, 1915-16 jyly turǵyzylǵan Saýda úıi jáne Syrymbet qonysy jóndeýden ótedi.