Sábıt Bıtaev Atyraý oblysy Tótenshe jaǵdaılar departamentiniń bastyǵy bolyp taǵaıyndaldy

NUR-SULTAN. QazAqparat - Atyraý oblysy Tótenshe jaǵdaılar departamentiniń jańa bastyǵy bolyp azamattyq qorǵaý polkovnıgi Bıtaev Sábıt Kenjehanuly taǵaıyndaldy, dep habarlaıdy QazAqparat QR TJM baspasóz qyzmetine silteme jasap.

QR Tótenshe jaǵdaılar vıtse-mınıstri Marat Kúldikov jańa bastyqty jeke quramǵa tanystyrdy.

Buǵan deıin Bıtaev Sábıt Kenjehanuly Nur-Sultan qalasynyń Tótenshe jaǵdaılar departamenti bastyǵynyń orynbasary qyzmetin atqarǵan.

Bıtaev Sábıt Kenjehanuly 1976 jyly 14 qazanda týǵan. 1998 jyly Qazaqstan Respýblıkasy Іshki ister mınıstrliginiń Almaty joǵary tehnıkalyq ýchılışesin órt qaýipsizdigi tehnıgi mamandyǵy boıynsha, al 2001 jyly Qazaqstan Respýblıkasy Tótenshe jaǵdaılar mınıstrliginiń Kókshetaý tehnıkalyq ınstıtýtyn órt qaýipsizdigi ınjeneri mamandyǵy boıynsha bitirgen.

Óziniń eńbek jolyn Almaty oblysy Memlekettik órtke qarsy qyzmet jedel bóliminiń ınjeneri bolyp bastady.

2008 jyldan búgingi kúnge deıingi aralyqta azamattyq qorǵaý organdarynda ártúrli basshylyq laýazymdarda qyzmet atqardy.

Vıtse-mınıstr TJD bastyǵynyń aldyna aldaǵy kezeńge, atap aıtqanda tabıǵı jáne tehnogendik sıpattaǵy túrli TJ-nyń aldyn alý jáne sanyn azaıtý boıynsha naqty mindetter qoıdy.