Sabına Mamadıarovanyń qolyna ota jasaldy

ASTANA. QazAqparat – Túrkııadaǵy jer silkinisi kezinde zardap shekken Sabına Mamadıarovanyń qolyna ota jasaldy. Bul týraly Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Jer silkinisinen aman qalǵan Sabına Mamadıarovanyń jaǵdaıyna kelsek, ol qazir Adana qalasynyń memlekettik aýrýhanasynda. Keshe onyń zaqymdalǵan qolyna operatsııa jasaldy. Densaýlyq jaǵdaıy turaqty. Dıplomattar emdeýshi dárigerlermen baılanysta, qajetti medıtsınalyq kómek kórsetilip jatyr. Búgin konsýl oǵan jeke baryp qaıtady», - dedi Aıbek Smadııarov.

Eske salsaq, QR SІM baspasóz qyzmeti taratqan málimetke saı, 7 aqpanda mınıstrliktiń jedel jelisine 4 dos jer silkinisinen keıin baılanysqa shyqpaı qalǵany týraly qońyraý túsken. Solardyń biri – Sabına Mamadıarova aman tabylǵan edi.

Buǵan deıin habarlaǵanymyzdaı, Mırbolat (Mırýs) Qurmashev pen Ádil Qadyrbekovtiń deneleri tabyldy.

Marqumdardyń máıitteri 11 aqpanda elge jetkiziledi.