Sábıinen aıyrylǵan áıel perzenthananyń úshinshi qabatynan sekirip ketti

QONAEV. QazAqparat - Almaty oblysy Qaskeleń kentindegi perzenthanada jatqan áıel úshinshi qabattan sekirip ketti, dep habarlaıdy QazAqparat tilshisi.

Bul týraly vıdeony zańger, qoǵam belsendisi Sáýle Bıkıteeva óziniń Іnstagram paraqshasynda jarııalady. Beınejazbada dárigerler oqıǵanyń qalaı bolǵanyn baıandap beredi.

«Úshinshi qabattan qulady. Ol kisi bizge tórt kún buryn túsken. Úsh júktilik bolǵan, úsheýi de sátsiz aıaqtalǵan. Birinshi balasyn ishinde joǵaltqan. Ekinshi balasyn ekomen kótergen. Ol balasy 26 aptasynda taǵy solaı keldi. Josparly túrde otaǵa alyndy. Úsh balasyn da joǵaltý ońaı emes qoı. Bosanýdan keıingi kúızeliske tústi me? Qasynda dárisin berip, medbıke turǵan. Medbıkeni ıterip jiberip, ózi sekirip túsken. Bala ishinde qaıtys bolǵan. ÝZI-de anyqtaǵan, qozǵalmaı qalǵan eken, balanyń júregi toqtaǵan, solaı perzenthanaǵa túsken. Kesar tiligi jasalǵannan keıin úshinshi kúni sekirgen», - dedi perzenthana ókili.

Qarasaı aýdandyq kópsalaly aýrýhanasynyń málimetinshe, áıel 3-qabatta ornalasqan jansaqtaý bóliminiń terezesinen sekirip ketken.

«Patsıent 37 jasta. Operatsııadan keıin 4 kún reanımatsııada boldy. Bosanǵannan keıin qatty kúızeliske túsip, emdelýden bas tartty, ózin agressıvti ustady. Ony barlyq arnaıy mamandar: anestezıolog-reanımatolog, neırohırýrg, travmatolog, hırýrg tekserdi. Barlyq qajetti saraptamalar jasalyp, tolyqtaı emdelip jatyr», - dep habarlady aýrýhana ákimshiliginen.