Sábıdi hıdjama ádisimen emdeý deregi tekseriledi - mınıstr

ASTANA. QazAqparat – QR Densaýlyq saqtaý mınıstri Ajar Ǵınııat sábıdi hıdjama tásilimen (aǵzadan qan shyǵarý) emdeý máselesine qatysty pikir bildirdi, dep habarlaıdy QazAqparat tilshisi.

Búgin Senattyń jalpy otyrysynan keıin tilshiler mınıstrden áleýmettik jelide taraǵan vıdeoǵa qatysty suraq qoıdy.

«Atyraýda náresteni hıdjama tásili arqyly emdep jatqanyn vıdeodan kórýge bolady. Bul qanshalyqty durys?», - dep surady tilshi.

«Búginde adamdar dástúrli emes medıtsınamen aınalysyp júr. Qalaı bolǵanda da olar medıtsınalyq kómek kórsetse, tıisti lıtsenzııany alýy kerek. Qazirgi kezde lıtsenzııalanatyn medıtsınalyq qyzmetke hıdjama jatpaıdy. Sondyqtan Komıtet (medıtsınalyq-farmatsevtıkalyq baqylaý) bul derekti qarap, tekserý júrgizedi. Aldaǵy ýaqytta osy máselelerdi qarastyratyn bolamyz», - dedi A. Ǵınııat.

Budan buryn QR Parlamenti Májilisinde dástúrli emes medıtsına naryǵyn tártipke keltirý qajet ekenin aıtqan edi.

Foto: hidzhame.ru