Sabaq ýaqytynda oqýshylarǵa juma namazǵa barýǵa bola ma - mınıstr jaýaby

ALMATY. QazAqparat – Sabaq ýaqytynda muǵalimder oqýshylardy meshitke jibere ala ma? Oqý-aǵartý mınıstri Ashat Aımaǵambetov Almaty turǵyndarymen kezdesýinde osy saýalǵa jaýap berdi, dep habarlaıdy QazAqparat tilshisi.

Eger ata-anasy muǵalimge eskertip qoısa, sabaq ýaqytynda oqýshyny juma namazǵa jibere ala ma? Qyz balalardyń hıdjab ornyna kımeshek nemese kapıýshony bar kıim kııýne ruqsat pa? Almaty turǵyny mınıstrge osyndaı suraqtar qoıdy.

«Biz zaıyrly memleketpiz, oqý oryndary da zaıyrly. Sizdiń qoıǵan saýaldaryńyzǵa jaýap ta soǵan baılanysty bolmaq. Biz zaıyrly memleket bolǵandyqtan, «joq» dep jaýap qaıtaramyz. Bizde mektep formasyna qoıylatyn talap pen jalpy erejeler bar», - dep jaýap berdi Ashat Aımaǵambetov.

Buǵan deıin mınıstr mektepterde otbasynyń tabysy men ata-anasynyń nesıesi týraly derekter suratylmatynyn aıtqan edi.