Sabaq kezinde oqýshy men muǵalimniń uıaly telefon paıdalanýyna tyıym salynbaq

ASTANA. QazAqparat – Sabaq barysynda oqýshylar men pedagogterdiń uıaly telefon qoldanýyna tyıym salynýy múmkin. Bul týraly «Ashyq» NQA portalynda jarııalanǵan Oqý-aǵartý mınıstrliginiń buıryǵynda kórsetilgen, dep habarlaıdy QazAqparat tilshisi.

«Bilim alýshylar bilim berý uıymynan tys bolǵan kezde bilim alýshylardyń ómiri men qaýipsizdigi úshin ata-analary nemese ózge de zańdy ókilderi jaýapty bolady. Bilim berý uıymynda oqý-tárbıe protsesin jáne bilim berý uıymynan tys jerde ótkiziletin oqý-tárbıe is-sharalaryn ótkizý kezinde bilim alýshylardyń ómiri men qaýipsizdigi úshin jaýapkershilik bilim berý uıymy basshysynyń buıryǵyna sáıkes pedagogterge júkteledi», - dep jazylǵan jańa redaktsııada.

Sonymen birge, jańa ózgeriske sáıkes mekteptiń ishki tártibine qarama-qaıshy áreket jasaǵan oqýshylar, olardyń ata-anasyna nemese zańdy ókiline eskertpesten mektepten shyǵarylmaıdy.

«Bilim alýshy teris qylyqtar jasaǵan, mekteptiń ishki tártip qaǵıdalary talaptaryn buzǵan kezde ony sabaqtardan shettetýge, sondaı-aq ata-anasynyń nemese ózge de zańdy ókilderiniń qasynda erip júrýinsiz bilim berý uıymynan shyǵarýǵa jol berilmeıdi. Bilim berý uıymy ata-analardy nemese ózge de zańdy ókilderdi qajet bolǵan jaǵdaıda olardy bilim berý uıymyna shaqyra otyryp, bolǵan jaǵdaı týraly habardar etedi jáne tıisti sharalar qabyldaıdy», - delingen qujatta.

Buǵan qosa, sabaq kezinde qajettilik bolmaǵan jaǵdaıda pedagog pen oqýshyǵa uıaly telefon qoldanýǵa tyıym salynady.

«Muǵalimniń sheshimi boıynsha sabaqta olardy qoldaný qajettiligin esepke almaǵanda, bilim alýshylar men pedagogtar sabaqtarda mobıldi baılanys quraldaryn paıdalanbaıdy», - dep ózgeris engizilgen buıryqqa.

Aıta keteıik, qoldanystaǵy zańnamada joǵaryda atalǵan erejeler joq.

Buıryq 28 naýryzǵa deıin kópshilik talqylaýda bolady.