Saakashvılıdiń jańa qyzmetke taǵaıyndalýyna baılanysty Grýzııa Ýkraınadaǵy elshisin keri shaqyrdy

KIEV. Ýkrınform-QazAqparat – Grýzııa úkimetiniń sheshimimen Grýzııanyń Ýkraınadaǵy tótenshe jáne ókiletti elshisi Teımýraz Sharashenıdze konsýltatsııa úshin Tbılısıge shaqyrylady. Bul jaǵdaı Mıhaıl Saakashvılı Ulttyq reforma keńesi atqarýshy komıtetiniń tóraǵasy bolyp taǵaıyndalǵannan keıin bolyp otyr, dep habarlaıdy Ýkrınform.

Grýzııa birinshi arnasynyń málimetinshe, bul jóninde Grýzııanyń syrtqy ister mınıstri Davıd Zalkalıanı málimdegen.

«Aldynda Saakashvılı usynǵan laýazym deńgeıiniń tómendeýi jáne onyń Ulttyq reforma keńesi atqarýshy komıtetine tóraǵa bolyp taǵaıyndalýy ýkraınalyq saıası spektrdiń, atap aıtqanda parlamenttegi kópshiliktiń oǵan senimsizdikpen qaraıtynyn kórsetedi. Bul jerde bizdiń oıymyzsha, Grýzııanyń Ýkraınanyń strategııalyq seriktesi retindegi pozıtsııasy eskerilgen. Degenmen, Grýzııa sot júıesi sottap, izdeýde júrgen adamdy elimizdiń strategııalyq seriktesiniń jańa qyzmetke taǵaıyndaýy kóp suraq týyndatady. Osyǵan baılanysty Ýkraınadaǵy tótenshe jáne ókiletti elshi Teımýraz Sharashenıdzeni Tbılısıge shaqyrtý týraly sheshim qabyldandy», - deıdi ol.

Degenmen, Zalkalıanıge sensek, Ýkraınamen dıplomatııalyq qarym-qatynasty buzý týraly másele kóterilip jatqan joq.

Eske sala keteıik, 7 mamyrda Ýkraına prezıdenti Vladımır Zelenskıı Mıhaıl Saakashvılıdi Ulttyq reforma keńesi atqarýshy komıtetiniń tóraǵasy etip taǵaıyndaǵan bolatyn.