S. Qaıyrbekova farmatsevtıkalyq qaýymdastyqtarmen dárilik zattardyń baǵasynyń ósýine jol bermeýdi qarastyratyn qujatty bekitti

ASTANA. 12 jeltoqsan. QazAqparat /Rýslan Ǵabbasov/ - Búgin Astanadaǵy «Densaýlyq saqtaý salasynda áleýmettik mańyzy bar jobalardy iske asyrýda úkimettik emes uıymdardyń róli» atty dóńgelek ústel barysynda dárilik zattardyń baǵasynyń ósýine jol bermeý boıynsha memorandým bekitildi.

Atap aıtqanda bul qujatqa Densaýlyq saqtaý mınıstri Salıdat Qaıyrbekova, «FarmMedIndýstrııa Qazaqstan» qaýymdastyǵy, Farmatsevtıkalyq qyzmetti qoldaý jáne damytý qaýymdastyǵy, «Farmatsevtıkalyq ónim dıstrıbıýtorlary» qaýymdastyǵy, Qazaqstandaǵy farmatsevtıkalyq fırmalar ókildikteriniń qaýymdastyǵy qol qoıdy.

Aıta keteıik, tegin medıtsınalyq kómektiń kepildik berilgen kólemi aıasynda densaýlyq saqtaý uıymdaryn dárilik zattarmen qamtamasyz etý mınıstrlik bekitken tizim boıynsha «SQ-Farmatsııa» JShS arqyly júzege asyrylady.

Memorandým dári-dármek baǵasynyń ósimin tejeýdi jáne tegin medıtsınalyq kómektiń kepildik berilgen kólemine kirmegen 200 dárilik zattardyń ataýyna naqty baǵany belgileýdi kózdeıdi.

Sonymen qatar atalǵan jıyn barysynda qatysýshylar memlekettik organdar men halyqaralyq jáne úkimettik emes uıymdar arasynda densaýlyq saqtaý salasy boıynsha ózekti máselelerdi talqylaýda. Atap aıtqanda, onda «Salamatty Qazaqstan» baǵdarlamasyn iske asyrýdaǵy ÚEU róli, durys tamaqtaný men azyq-túlik ónimderiniń qaýipsizdigi, qant dıabetimen aýyratyn emdelýshilerdiń ómirin jaqsartý boıynsha áleýmettik jobany iske asyrý turǵysyndaǵy jáne basqa da máseleler qaraldy.