S.Batyrhanovanyń ólimine qatysty sot otyrysy 1 aıdyń kóleminde ótýi tıis - SІM

ASTANA. 21 aqpan. QazAqparat - «Batyrhanovtardyń januıasy nemeresimen kúnine 5 saǵat kezdesedi. Al zań qorǵaýshymyzdyń aıtýynsha, búgingi kúni sotqa qajet barlyq qujattar berilip, sot otyrysynyń ótýi kútilýde.

Sot otyrysy shamamen bir aı ishinde bolýy tıis. Atalmysh is Syrtqy ister mınıstrliginiń udaıy nazarynda»,-dedi búgin Syrtqy ister mınıstrliginiń resmı ókili Altaı Ábıbýllaev jýrnalıstermen bolǵan brıfıngte.

Onyń aıtýynsha, 22 qańtarda Qazaqstan Respýblıkasynyń  «Halyqaralyq baǵdarlamalar ortalyǵy» Batyrhanovtar januıasyna bólingen qarajattyń kómegimen jáne Qazaqstannyń Sıngapýrdaǵy Elshiliginiń qoldaýymen, Batyrhanovtar otbasyn Kvınslend shtatynyń Brızben qalasyna alyp kelgen. Sol kúni Qazaqstannyń Sıngapýrdaǵy Elshiliginiń Konsýly kelip, Saǵynaıdyń ata-anasyn onyń isin júrgizip jatqan zań qorǵaýshy Kaılı Perkıns hanymmen tanystyrdy.

«Kelesi kúni zań qorǵaýshy Saǵynaıdyń ata-anasyn nemereleri Manýelge qarap jatqan jergilikti Bala qorǵaý uıymynyń qyzmetkerlerimen kezdestirdi jáne Saǵynaıdyń ata-analaryna ózderiniń nemerelerin kúndelikti kórip turýyna qajetti sharttardy jasady»,-dedi resmı ókil.