S. Ahmetov Kólik mınıstrligine jyl sońyna deıin áleýmettik mańyzy bar qyzmetterdi 100 paıyz elektrondy formatqa kóshirýdi tapsyrdy

ASTANA. 19 naýryz. QazAqparat - Búgin Úkimet otyrysynda QR Premer-Mınıstri Serik Ahmetov Kólik mınıstrligine jyl sońyna deıin áleýmettik mańyzy bar qyzmetterdi 100 paıyz elektrondy formatqa kóshirýdi tapsyrdy.

Atalǵan vedomstvo basshysy Asqar Jumaǵalıevtiń atap ótýinshe, mundaı qyzmetterdiń sany 31. Olardy 100 paıyz elektrondy nusqaǵa kóshirý nátıjesinde turǵyndar men bıznes ókilderinen burynǵydaı 40 mln. astam qaǵaz qujat talap etý qajeti bolmaıdy.

«Kólik jáne kommýnıkatsııa mınıstrligine múddeli memlekettik organdarmen birlesip aǵymdaǵy jyldyń sońyna deıin áleýmettik mańyzy bar memlekettik qyzmetterdi 100 paıyz elektrondy formatqa kóshirýdi tapsyramyn. Ruqsat berý qujattaryn avtomattandyrý boıynsha jumystardy belsendendirý qajet. Bilim jáne ǵylym mınıstrligi elektrondy oqytý jobasyn júzege asyrýdy jalǵastyrýy tıis»,-dedi QR Premer-Mınıstri.