Rjev qalasynyń túbinen qazaq soldatynyń súıegi tabyldy
Qaldyqtyń qazaq sarbazyna tıesili ekenin «Pıoner» izdeý toby anyqtaǵan. «Rjev-2019» degen atpen ótken izdeý sharalary kezinde uzyn sany 117 soldattyń qabiriı tabylypty. Іzdeý jasaǵynyń komandıri Mıhaıl Bogdanovtyń aıtýynsha, olardyń bári 1942 jyldyń tamyzynda Rjev aýdanynyń Belkov oıpatynda bolǵan qandy shaıqas kezinde jer jastanǵan.
«Eki aptanyń ishinde keńes áskeri sapynan 3500 adam jer qushqan degen derek bar. Arasynda qazaq jaýyngerleri óte kóp bolǵan eken. 1 mamyr kúni Belvo oıpatyndaǵy shuńqyrdan úsh áskerdiń máıiti shyqty. Sonyń ishinde vıntovka gılzasynan qolmen jasalǵan medalon tabyldy. Gılzanyń ishine hat búktep salypty. Shuńqyrdaǵy úsh máıittiń biri - 220 atqyshtar dıvızııasynda soǵysqan 19 jastaǵy qazaq sarbazyna tıesili ekenin sol hattan bildik. Sarbazdyń aty-jóni men týǵan jyly, mekenjaıy anyq oqylyp tur» - deıdi Mıhaıl Bogdanov.
Tabylǵan jazbadan Іzjanov Nurǵazy esimdi sarbazdyń 1923 jyly týǵanyn, maıdanǵa Qostanaı oblysynyń Torǵaı aýdanyna qarasty Saǵaı aýyldyq keńesiniń Araı kolhozynan attanǵanyn oqýǵa bolady.
«Marqumnyń Qazaqstandaǵy týystaryn izdestirip jatyrmyz. Tapsaq, tabylǵan máıitterdi arýlap kómý rásimine shaqyramyz. Saltanatty rásim Rjev qalasynda 22 maýsymda ótedi. Eger súıek jalǵyz jatqan bolsa, týǵan otanyna jerleýge bolar edi. Bir shuńqyrdan úsh sarbazdyń súıegi birdeı tabylǵandyqtan, ony bóle jaryp, aıqyndaý qıyn. Sondyqtan úsheýi de Rjev túbinde jerlenedi» - deıdi izdestirýshi toptyń jetekshisi.
Tarıhı qujattarda atalmysh shaıqasqa Qazaqstanda qurylǵan №100 jáne №101 ulttyq atqyshtar brıgadasy qatysqany kórsetilgen. Shaıqas kezinde qazaqstandyq sarbazdardyń 80 paıyzy oqqa ushqan degen derek bar.
Avtor: Medet Ahmetov