Rústem Ábdirashtyń halyqaralyq festıvaldan bas júlde alǵan tarıhı fılmi Portýgalııada kórsetildi

ASTANA. QazAqparat - Belgili qazaqstandyq kınorejısser Rústem Ábdirashtyń «Qazaq handyǵy. Almas qylysh» kınokartınasy eń úzdik fılm dep tanylyp, Eýropalyq Parlamentpen birlesip Braga qalasynda jyl saıyn ótetin «BRAGACINE» táýelsiz kıno halyqaralyq festıvalinde gran-prı júldesin aldy.

Sondaı-aq, kınofılm «Eń úzdik rejısserlik jumys» nomınatsııasynda jeńiske de jetti, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.

«Biz bul jobamen birneshe jyl aınalystyq jáne Qazaqstanda birinshi bolyp tolyqmetrajdy kórkem fılm men tarıhı serıaldy usyndyq. Meniń oıymsha, fılm tarıhymyzdy tek bizdiń elimizde ǵana emes, odan tys jerlerde de kórsetýge laıyqty», – dep atap ótti R. Ábdirash.

Qazaqstandyq fılmdi portýgaldyq kórermenderdiń jyly qabyl alýy osy sózderdi rastaǵan tárizdi. Kıno jáne teledıdar salasyndaǵy sarapshylar, sondaı-aq bolashaq kınematografıster qazaq tarıhymen, mádenıetimen jáne kóshpeli órkenıettiń ómirimen qyzyǵýshylyqpen tanysty.

Kınofestıval dırektory, Mınıý ýnıversıteti Kınematografııa ınstıtýtynyń professory Artýr Barrosa Moreıra Qazaqstannyń shyǵarmashylyq tobyn quttyqtaı otyryp, jeńimpaz fılmniń joǵary kórkemdik deńgeıin atap ótip, qazaqstandyq kınematografpen alǵashqy tanysý shynaıy dostyq pen seriktestiktiń bastamasy bolǵanyn jáne onyń jalǵasyn tabatynyna úmit bildirdi. Festıval aıasynda birneshe eýropalyq dıstrıbıýtorlar qazaqstandyq fılmdi aǵylshyn tildi kórermen úshin prokatqa shyǵarýǵa nıet bildirdi.

«BRAGACINE» - Portýgalııada 2003 jyldan beri ótkizilip kele jatqan jáne Eýropa, Amerıka jáne Azııa fılmderin jınaıtyn halyqaralyq táýelsiz kınofestıval. Bıylǵy jyly 20-shy mereıtoılyq baıqaý okrýgtiń mýnıtsıpalıteti basshylyǵynyń, saıasatkerlerdiń, dıplomattar, tanymal akterler, synshylar jáne Mınıý ýnıversıtetiniń bolashaq kınorejısserlarynyń qatysýymen «Braga Parque» eń úlken kıno ortalyǵynda ótti.

Foto: gov.kz