Rýstam Mınnıhanov Qazaqstandaǵy tatarlarmen kezdesti
Kezdesý «Tatarstan - Jańa ǵasyr» teleradıokompanııasynyń korrespondenttik pýnktiniń Qazmedıada ótken ashylý saltanatynan keıin boldy. TR vıtse-premeri, tatarlardyń dúnıejúzilik kongresiniń «Mıllı Shýra» ulttyq keńesiniń tóraǵasy Vasıl Shaıhrazıev moderator retinde sóz sóıledi.
Qazaqstandaǵy tatar jáne bashqurt kongresiniń basshysy, Qazaqstan halqy Assambleıasy keńesiniń múshesi, Tatarlardyń dúnıejúzilik kongresiniń «Mıllı Shýra» ulttyq keńesiniń tóraǵasy Taýfık Karımov Prezıdent Rýstam Mınnıhanovke Qazaqstandaǵy tatarlar qaýymdastyǵynyń damýy týraly baıandady.
«Qazaqstan Prezıdenti Nursultan Nazarbaevtyń jáne sizdiń Tatarstanǵa jasaǵan saparlaryńyz Astana men Qazan arasyndaǵy ekonomıkalyq jáne mádenı yntymaqtastyqty damytýǵa zor yqpalyn tıgizedi. Qazaqstandaǵy tatar halqynyń atynan Astanada ashylǵan «TJǴ» korrespondenttik pýnkti úshin alǵysymdy bildiremin. Biz osy maqsatta byltyr tamyz aıynda sizge Taldyqorǵanda ótinish bildirgen edik. Al endi Astananyń 20 jyldyǵyna oraı jeke qatysýyńyzben saltanatty ashylý rásimin tamashalap otyrmyz. Reseıden tys jerdegi TJǴ-nyń alǵashqy korrespondenttik pýnkti aqparat taratý salasyna zor úlesin qosyp, ulttar arasyndaǵy dostastyqty nyǵaıtady. Onda kórsetiletin baǵdarlamalar tek tatar halqyna emes, qazaqtar úshin de qyzyqty bolady. Sebebi bizdiń dinimiz de, dástúrimiz de, tilimiz de - bir, - dedi T. Karımov.
Onyń aıtýynsha, dál qazir Qazaqtardyń dúnıejúzilik qaýymdastyǵy men Tatarlardyń dúnıejúzilik qaýymdastyǵy arasynda, sondaı-aq, eki eldiń irgeli aqparattyq agenttikteri - QazAqparat jáne Tatar-Aqparat arasynda memorandýmǵa qol qoıý boıynsha jumystar atqarylyp jatyr.
Kezdesýge Qazaqstan tarapynan Qazaqstan halqy Assambleıasynyń tóraǵa orynbasary Islambek Saljanov, Qazaqtardyń dúnıejúzilik qaýymdastyǵynyń tóraǵa orynbasary Arǵyn Ospanov, «QazAqparat» Halyqaralyq aqparat agenttiginiń bas dırektory Asqar Omarov, Qazandaǵy QR Bas konsýly Erkin Tuqymov qatysty. Shara barysynda Tatarstannyń Qazaqstandaǵy jańadan taǵaıyndalǵan ýákiletti ókili Denıs Valeev tanystyryldy.