Rýslan Jaqsylyqov áskerge barǵysy kelmeıtin jastarǵa syn aıtty

NUR-SULTAN. QazAqparat – QR Qorǵanys mınıstri Rýslan Jaqsylyqov oqýǵa túsken jáne jas balasy bar jastardy áskerge shaqyrý máselesine qatysty pikir bildirdi, dep habarlaıdy QazAqparat tilshisi.

«Kez kelgen azamattyń qasıetti paryzy – memleketti qorǵaý. Er azamat 18 jasqa tolǵannan keıin áskerı boryshyn óteýi qajet. Bul talap mindettelmeıtin jaıttar bar. Merzimin keıinge qaldyrý sheshimin jergilikti áskerı komıssarıat qabyldaıdy. Bizde jastardyń ásker qatarynan boı tasalaýy óte kóp kezdesedi. Alaıda zań bárimizge ortaq», - dedi mınıstri Májilistiń kýlýarynda.

Onyń aıtýynsha, eger áskerge jasy tolǵan azamattyń qolynda joǵary oqý ornyna túskeni týraly anyqtama bolsa, boryshyn óteý merzimi keıinge qalady.

«Eger jas azamat atyna áskerge shaqyrtý qaǵazy kelse, oqýǵa túskeni týraly qujatyn jergilikti áskerı basqarý organdaryna ýaqytynda bermegen degen sóz. Bar bolǵany osy. Eger áskerı boryshty keıinge qaldyrýǵa quqyńyz bolsa, tıisti qujatyńyzdy ótkizińiz. Sonyń negizinde keıinge qalasyz. Balańyz jas bolsańyz da, oqýǵa tússeńiz de, osylaı ýaqytynda qujat tapsyryńyz. Biz qujatty ýaqytynda bergenniń ornynda qashqaqtap júrip alamyz», - dedi Rýslan Jaqsylyqov.

Sondaı-aq ol ásker qataryna shaqyrýshylar tarapynan da zań buzý faktisi bolýy múmkin ekenin moıyndady.

«Men ondaı jaıttyń bolý múmkindigin joqqa shyǵarmaımyn. Jastardan joǵary oqý ornyna túsip, UBT tapsyryp, qujattaryn oqýǵa ótkizip qoısa da áskerge shaqyrylǵany týraly ótinishter kóp túsedi. Óıtkeni olar jergilikti ákerı basqarma organdaryna tıisti qujattardy ýaqytyn ótkizbeıdi. Tıisti anyqtama berińizder, biz merzimdi keıinge shegerý múmkindigin beremiz», - dedi mınıstr.

Aıta keteıik, búgin Qazaqstanda «Aıbyn» áskerı-patrıottyq jastar jıyny bastaldy.