Rýslan Qusaıynuly: Ult densaýlyǵy - memlekettiń negizgi basymdyqtarynyń biri
Rýslan Qusaıynuly atap ótkendeı, Joldaýda medıtsınalyq qyzmettiń sapasy halyqtyń áleýmettik jaǵdaıynyń mańyzdy komponenti retinde belgilendi. Nursultan Nazarbaev eń aldymen, medıtsınalyq-sanıtarlyq alǵashqy kómektiń qoljetimdiligin, ásirese aýyldyq jerlerde arttyrý kerektigin tapsyrdy.
«Alǵashqy medıtsınalyq-sanıtarlyq kómektiń damýy - bul qoǵamdyq densaýlyqtyń da damýy. Óıtkeni, bizdiń ortalyǵymyzdyń qyzmeti, eń aldymen, qoǵamdyq densaýlyqty saqtaýǵa jáne jaqsartýǵa, aýrýlardyń aldyn alýǵa baǵyttalǵan. Al alǵashqy medıtsınalyq-sanıtarlyq kómek medıtsınalyq kómek kórsetý júıesiniń negizi bola otyryp, aldyn alý, dıagnostıkalaý, syrqattardy emdeý, medıtsınalyq ońaltý, júktilikti baqylaý, salaýatty ómir saltyn qalyptastyrý jáne halyq arasynda sanıtarlyq-gıgıenalyq aǵartý jumystaryn júrgizý sııaqty sharalardy qamtıdy», - dedi ol.
Mınıstrlik ókiliniń aıtýynsha, qazirgi tańda Qazaqstanda otbasy densaýlyǵyn nyǵaıtýǵa negizdelgen densaýlyq saqtaý salasynyń alǵashqy býynyna basty nazar aýdarylady, áleýmettik baǵyttaǵy model oıdaǵydaı iske asyrylýda.
«Bul óz kezeginde, otbasylyq dáriger, meıirbıke, áleýmettik qyzmetker jáne psıholog mamandarynan turatyn komandanyń jumysy arqyly keshendi kómek kórsetýdegi alǵashqy medıtsınalyq-sanıtarlyq kómektiń múmkindikterin keńeıtedi, patsıenterdiń máselelerin sheshýge jaǵdaı jasaıdy. Osylaısha, alǵashqy medıtsınalyq-sanıtarlyq kómek deńgeıinde densaýlyq saqtaý júıesiniń damýyn anyqtaıtyn mańyzdy prıntsıpter júzege asyrylady - «syrqattan denniń saý bolýyna deıin» jáne «emdeýdiń ornyna oqytý jáne qamqorlyq kórsetý».
Elbasynyń Joldaýyn iske asyrý sheńberinde biz halyq densaýlyǵyna qamqor bolýǵa, jaraqat alýlardy boldyrmaýǵa, negizgi ınfektsııalyq emes aýrýlardyń aldyn alý, durys tamaqtaný, skrınıngterden ótý, temeki tartýdy, tuzdy, transmaılardy paıdalanýdy azaıtý boıynsha zańnamalyq bastamalar jasaýǵa baǵyttalǵan sharalardy ary qaraı jalǵastyratyn bolamyz.
Qazaqstan bıyl 40 jyldyǵy atalyp ótetin Almaty Deklaratsııasynyń ustanýshysy bola otyryp, alǵashqy medıtsınalyq-sanıtarlyq kómektiń damýyna erekshe nazar aýdarady. Onyń prıntsıpterin kezeń-kezeńmen oryndaýda. Іske arylyp jatqan 2016-2019 jyldarǵa arnalǵan «Densaýlyq» memlekettik baǵdarlamasy Almaty Deklaratsııasynyń prıntsıpterimen úndesedi», - dedi R.Qusaıynuly.
Qoǵamdyq densaýlyq saqtaý ulttyq ortalyǵynyń dırektory orynbasarynyń pikirinshe, búkil jumystyń nátıjesi retinde halyqqa densaýlyq saqtaýdyń alǵashqy býynynyń, ásirese aýyldyq jerlerde qoljetimdiligi men sapasy, profılaktıkalyq baǵdarlamalardyń tıimdiligin arttyrý, aýrýlardyń aldyn alý bolyp tabylýy kerek.
«Alǵashqy medıtsınalyq-sanıtarlyq kómek qyzmetkerleri - adammen alǵashqy bolyp kezdesetin densaýlyq saqtaý júıesindegi mamandar. Áriptesterimiz - aýrýlardy basqarýda jańa ádisterdi engizip otyrǵan ýchaskelik qyzmetkerlerdiń 2019 jyldyń 1 qańtarynan bastap jalaqylary ósetini qýantady», - dep túıindedi ol.